Congregational Church of India (Maraland) ta, Saikao (Hqrs) su liata Tari 05.08.2010 pata Special Assembly aw ta, he Special Assembly liana heta CCI (M) nata ECM Apôhkhana a y thei nawpata Rev. Violet Loiuse Anne Mark ta ahawna a tao. Anodeikua cha, CCI (M) nata ECM Apôhkha nawpa kyh liata Bie-do-leipa athata a pathah-pa vata, zawpi pahno aw pata he a ry liata rohpa tlai ta Bie-Dopa palahana taopa a cha.
1. “SÔH TA MANIAH ZUA EI TA, SÔH TLAICHHAINA VATA APÔHKHANA TAOPA HE KHO MAPI”: Awnanopa Apôhkhana awpata Zawpi sôh ta zuana y hrao vei. Hria chiehna hlao pie thei leipa staff zy ta eima hneipa cha, Hyutuhpenawh zyta, “Vaw phaw thla ha tua ula,” ama tahpa vata a bie pata palasapa tla a cha. Sôh lana tlyma, daona tlyma, piepa tlyma y tla vei. A biepa ngalah ta tla palahahpa a cha. Eima hriana hlao khô la liata sôh pie awpata a hawna y vei. Apôhkhana kho leipa hnoh ta pasai pa-i na y hra vei. Eima khona nata pachana chyu liata moto eima sie awpa a cha.
2. “AHAWNA PATHAIH LEIPA, CONTRACT RAI ZY, O-HMO ZY NATA SAWKHA RAIZY PIE AWPATA AHAWNA AMA TAO” : Ahy chyhsa bie hneituhpa hnoh tlyma, Awnanopa chhituhpa lata tlyma, he hawpa ahawna he taopa y tla vei. Eima hriana hlao chhao maniah pie thei leipata, riethei kaw hra ei sihla, eima rairuna reih beih leipa pita, eima zachhihna pahlei nawpa taihta hmo angia leipa ahawna tao awpata palôh hnei leipa Chhituhpa cha mapi. Anodeikua, kyhpachana vata saiheina hmotaopa deikua kyh nanopa a cha pata eima pahno.
3. “ZAWPI MANIAH PAHNOSA TUA LEI PATA HMO AMA TAO”Apôhkhana he Assembly nata Committee pahnokhei pata reih lyma pa chata, a ru lata reina y hrao vei. Ahnôh chaipa liata Rev. Violet Loiuse Anne Mark ta ahawna ataopa chhao Pastor zydua pahnosa ta, AEC liata ano pakah tlai ta reih heih ta, cha ta Local Church zydua a pahnosapa a cha. Zawpi nata Committee pahno lei pata a ru lâta hmo taopa y vei. Kho leina vata bie reipa tla a cha pata eima pahno.
4. “THLUAHRUA PATA, KHAPA HMATA REIH LEI PATA APÔHKHANA TAO AMA KHOH” Awnanopa Apôhkhana kyh liata hmo pachypa a hnei leipa hawhta reina he a do vei. ECM Nôpaw-penawh zy chhao a pahy ngasa ei ta, Saikao he Mission Hqrs ta tao awpa khoh ei ta, ama paryhsapa a cha. CCI(M) Staff zy, Project zy, Mission Field zy nata Mission Field liata Hriatuhpa zydua ama pyh thei khai hra. Moh kyh lia deikua cha ECM Assembly bie pathlu chiehpa parao thai awpa a châ leipa vata, ECM moh ta apôhkha chy ta, Ko 2011 Assembly a vaw tlô awpa daihti liata Congregational (C) pahlao awpata Official Agenda tao ta, reih awpa chhao khoh ei ta, ama paryhsa hrapa a cha. Chavata, Thluahrua pata apôhkhana châ lei pata, byhna hluhpi chhao ta apôhkhana taopa tlao a cha tahpa he bah pahno thai ei suh u.
5. “ZAWPI HLUH VIA BIE A PAPEISA LEI PATA A YPA CHYHSA CHA CHYHSA MOLEIPA A CHA”Chyhsa ahy hmata mosiapa y tla mapi. Eima zydua ta moleipa sai eima cha. Zawpi hluh viapa pachana he, pachana dopa cha khai hlei vei. Kana rah mohpathlituhpenawh 12 tuapa hry liata chyhsa hluh viapa 10 ta Bie-do-leipa ama reih. Chyhsa chyhvia syulyu, 2 ngalah ta Bie-dopa reih pata ama chahkhei tahpa Biehrai liata eima hmô.Kô 1989, New Siaha Assembly daihti liata, Zawpi hluhviapa Biepathluna a pyh khoh leipa chyhsa-zy kha a hy e ama cha? Keimo eima cha kha zaw! Khazia a hluh viapa pachana nata Biepathluna kha eima pyh vei? Chavata, a hluh viapa pachana he hmo a doh chaipa cha ngâ-thlah hlei vei tahpa a pyh thai ei suh u.
Rev. L. Lychhua,
Camp: New Colony.
Source: Moonlight Daily Newspaper
