Hyderabad: A ei-khana châta MSO (Hyd) tâ târi 21.08.2010 khata Freshers’ Day a hmâ ei ta, 2nd General election chhao he no heta hneipa a châ hra. He ahmana su he Hyderabad Study Circle Auditorium liata châ ta, zâlâ daw 2.00pm ta daihti hmâ pathaopa a châ, Malu 78 ama pua pakhy.

Chief Guest châta ama hruapa Puhpa Samuel Lalnghatliana Ralte, Scientist nata achhokhazy chhaota Freshers’ Day he ama hmakhei hra. He ahmâ na he Session sano lâta pachhaihpa châ ta, First Session cha St.Lalremruata Khithie ta chhihtha ta, Ls. Steffi C.Beingiachhiezi ta pathaona hnei ta, St.Nelson Hlychho ta hlasana ahnei khai tawhta Chief Guest ta sahlao avy pakhypazy hnota pasyuna bie pha ngaitapa a reih.

St.Syuhlo Beichakhei Mara Nô Pihno HC.Ngobi (Theiva) nata St. C. Alfred Paw Puhpa C.Moho (Laki) adaihti lei kawpata he khizaw ama puasaipa taokheizie pâlasa n’awpata Silent Prayer hneipa châta, taokheina hmopiepa chhao hlâpa a châ.

Second Session cha Ls. Embassy Lawbei nata St.HC.Lallawmsanga zy ta pahnie kawpata chhihtha ei ta, sahlaozy ama palysa kaw.

St.Lalzarzoa, Secretary Hyderabad Mizo Association ta hruana papei mawhsa ta biereina ahnei theipa vâta achô liata MSO (Hyd) âly ngaita kaw. Freshers zy hmia pahnona (Fresher’s Self Introduction) ama hnei khai tawhta, Modern Sawlakia angia ngâsa pata St.Pious College laihsa nata Sitaphalmandi vaih liata satlia zy ta lâ ei ta, Awkhypa lâ chhao âmo sahlao zy ta ama pamohsa hra. Hyderabad khihpi liata Modern Sawlakia nata Awkhypa lâ pamosana hmiatua chaipa a châ. Miss nata Mr Fresher’s atlyna hneipa châ ta, Miss Fresher’s châta Ls.Bedsida Tlâpyu nata Mr Fresher’s châta St. C. Alfred zy atlyhpa ama châ. Ls.V.Sawmveli, Advisor chhaota pasyuna bie pha ngaihtapa arei hra.

General Election ei-nona he Puhpa Derick Salai Solo, Returning Officer nata Ls.TT.Hraisia Asst.Returning Officer zy ta hneikhei ei ta. Ary liata moh palasapa zy he 2010-2011 session chhôhta chhihthatuh châta atlyhpa ama châ:

President: St. Delson Notlia

Vice President: St. HC.Lallawmsanga

General Secretary: St. Edmund VB Hlychho

Asst. General Secretary: St. V.Hrualai

Treasurer: Ls. Embassy Lawbei

Genaral Election patlô tawhta chhihthatuh paropa nata thiehpa zyta charge ahla ei ta, Out going President vyuhta St.Lalremruata Khithie ta biereina hneita, President (Elect) St.Delson Notlia ta chhao biereina ahnei hra.Ls. Christina B.Hlychho ta Vote of Thanks hnei ta, Paw Thlahchhana ta ama daihti cha khawpa a châ. Kychhina (Dinner) hneipa châ ta, Sahlao avy pakhypazy cha Awhsa, Vaosa niepa nata keimola Hmiakhu tiha pahrao pata paloh tlâ kawpata ama pai.

Note: Thumbnail Photo liata click la Medium size a kaw la aw ta cha ta Medium size lia click heila Full Size ta na view thei aw.