Skip to main content



Poh Pheiky saihpa by L.Beimokhai

*Poh Pheiky saihpa*
_(Hnôhlâ daihti nata Christmas Chysia)_

_*~ L. Beimokhai*_

*Chasipaw :*
            Chasipaw no ta apihpa ei châ vâta ma a châ h’aw tly? Chasipaw daihti he paphasa kaw tyh na ta, kôkha chhôh daihti pachhaihpa miapalih, nopi, sao, châhvâ, chasipaw lia heta chasipaw daihti heta ei palôh na hria chai tyh ta, eima Beipa nata Pachhatuhpa Zisu Krista pihna daihti a vaw châ nahta chhochhi he cha hnôhlâ daihtizy pachâ tyh na ta, ei palôh âlie kaw tyh.

           Eima hawti daihti liata Christmas kha cha Christmas zydua liata a Christmas pahchai khiahma tah thei awpah he châ tyh ta. Keimo tluta Christmas daihti a pasôpa kha y thlyu aw veih ei, tah thei awpah he a châ tyh.

          Eima hawti daihti liata eima daihti hmâh dâhzy kha rei na ai thei tyh vei. Dyhchhie kachepa chhôhkha tawhta a vaw laiseihpa pi cha apalaikhei awpah hmo hlâta rairuna biezy reih awpah vaw hluh via tyh ta, chata hra sala rairuna eimâ tyhpa nata eima vaw chatôhpazy kha my thei lei awpah hmo maniah paryutuhpazy ama vaw châ.

*Viahkao cheikarâri atupa :*
          Lôhmaohna daihti lia khata keimo dei châ leipa pi ta, ahyrai tah ei sih la, eima pakyh phapa sahlao kha cha pathaihna kyh liata aphahla kaw sai pi ta, ahyhmahta a pathaih palyuh kawpa nata a rohpahâh kawpa chhao y ma pi. Eima viasa sahlao liata bâhta khihsa thei viapazy chhao kha pahânoh na tah leipa ta cha pathaih pyly hlei hra veih ei.

           Kô kha liata eikha ngâlâh nôpawzy ta chysia tlâ maniah chaleipa tyh ei ta, cha chhao cha Christmas chyta a mâ nao chaipa chi maniah ama chaleipa tyh hrapa kha tlâ châ ta, cha bailai ta keimo khata pasô ta, chadochadao thai heih leipa pi ta, kopi kô kha a ualuapa sai rô tlâ eima kyh tyhpa vâta eima viahkaozy cha a cheikarâri atu khai ha ta, eima viahkao hrai (Heihlâ) hra cha eima sie na ta âbohpa y lalih khao leipa ta, âkhophie ngâlâh viahkao liata âbapazy sai châ ta, eima hnati hra cha buakha nahta buakha ta tlaoh thlâh ha ta, eima viasa hry liata chhao khatino rai ta a hnapasu nata pakah likawh liata Number Eleven (11) â roh ngâthlâh hapazy chhao ama y.
 
           Viahkao dei vei, chaopasy cheingei chhao hmahta a hnôhlâ cha byhchhôh hluh katôpa hawhta ama baithlana sai y ta, eima pahkhu dady chhao âbohpa a sôh kaw tyh. Nôpawzy khata maniah hrâkyu hmâ leipa ei ta, zâlâ lyu lâ tawhta ama kaw tlô tawhta azo amô daihti hlâta eima hmôpa nata mydi kha eima kiah liata maniah ama ypâ daihti y chhôhpa tlâ châ ta, maniah pathaipahâ awpah ta daihti rai vaw hnei veih ei. Daihti ruata nota tikhaoh lâ maniah achhi ei ta, âchieh pâ thlâhpa ta lôta pha kawpa ta eima mahri thata aky ngâna taihta maniah ama chata tyhpa kha ama khohdaih parei kaw tyh.
 
         Siku kiah daihti vaw châ ta, eima sahria eima nô nahta maniah ama biepa cha, eima hâh chhao chata byuh tahpa pachâna rai hnei hlei leipa na ta, eima kuparo dâhpithu roh chhao pai leipa ta paza parapa ta, thlai a aopa ta eima viasa nah cha aw pâ lymâ pi ta, â mo chhao ama pakah liata ama lao niepa chhao palâ khai hmâ leipa ta thlai kaw pua parapa ta miah vaw pazi pâ lymâ hra ei ta, siku eima tlôpa cha achatôhchalih pâ lymâ pi ta, eima mathlai ti cha eima khi liata za loh lymâ ta, eima ku dâhpithu roh chhao a pai leipa khata thlai a kaw hru para heih pi ta, châhrasala ahyhmahta “Na roh a chhie” â tah tlâ hlei ma pi, Oriflame roh chhao eima thei beih tawhta la mao hlei hra ma pi.

         Dawh vaw paro ta, hyutuhpazy chata tlyhmia liata maniah vaw paduasa heih ei ta, pahno awpah peimawh viapazy ama phuah khai tawhta, siku hawti hry liata apua viapa nah vaw mohpado ei ta, eima pua nahta pua lei cha vâ lâ maniah pa-uasapa ta eima rao cha ama moh tua chai tyh.

           A pua viapa nah cha a kâ lâta paduasa lymâ ei ta, ei yna dady cha thlai vaw tlô hra ei ta, pahânoh ei pâ ta tikhaoh lâ nâ chhi ta, eima mahri zydua eina chatapa khai tawhta Hriatuanoh eima tlô tua chai noh a châpa vâta phie ei boh haw.
A pua viapa nah cha Siku tawhta âhla tu leipa tikhaoh lâ ngai asi awpah ta Hyutuhpazy ta ama chaleipa, “FERISTA” sâhbaw ta ngai asi awpah ta ama tuah haw.

*Talailih :*
         School bâh awpah cha angiatiah lei ngaita tyh pi ta, achhâpa cha khâpa hro vâ chhao châ hlei leipa ta, talailih ( eima reih tyhna dâh :Dawhlailuh) kiah awpah eima ngiatiah tyh lei vâta a châ hri. Chysia eima hnei chyh hleikhô ta eima hneichhôhpazy a chhie sai bailai ta, talailih kiana liata eima chaopasyzy cha pua pyu khai ta, talailih tao n’awpa ta thukhai eima hmâpazy cha a thiehpa eima chalei thei vei tawhta cha, ahy nah o ama phiena liata ama thypa, a parohpazy pakhypa ta eima pahtlâ chhyhpa sai a châ vâta thuakhai ta eima chaopasyzy cha thuapa ta â hriechheih khai ha tyh. Eima viasa pakha chhao Christmas nota a paw ta chaopasy thiehpa ta a chaleipa ta talailih cha kiah ta, a chaopasy chao liata thuakhai ta thuapa ta âhrie ha ta, o â dipa cha a paw ta beih phy ta thata phy ta, a chapa nata sâpa pyu chata vâ ki a daih tah thei awpah a châ.

           Talailih kiapa vâta o adina châh pahno leipa ta eima y daihti hluh kaw ta, apiepasina vâta hmah eima phaoh no chhao ta chhôhkha eilaw eima hlao daihti a hluh kaw  tyh.

            Talailih a hneipazy kha apapisa kaw tyh pi ta, eima viasa nah a hnei leipazy  ta chakhâ lâ ama mathlai chhaota maniah tôh lymâ tyh ei ta, vâro tlai maniah ama tôh tawhta a hnôhky lâ liata maniah abaipa ta eima za phaoh tyh hra. A yzie cha 15 Minutes mathlai chhaota maniah tôh ei ta, 5 minutes ama kiah thei tyh hra tahna a châ. Talailih liata hmahta a Steering a hneipa chi a hneipa nah chhochhi kha cha eima uahva via heih tyh.
 
          Eima viasa pakha chhochhi la talailih eikha kiah awpah vâta awh-ie a paliepa chhao ama mâtâ. Nama pahneichhi kaw thei aw ta, nama pasi kaw thei hra aw.

           Anodeikua a daihti no pachâpa ta la talailih kia tluta byuh chhihpa nata tlaichhi chhihpa kha a sôh tu ha. Awh-ie eikha palie ta viasa hluhpi ta ama kiah thei leipa talailih kiah awpah cha a châta a sôh kaw hra mâ my.

*Di thla eima tlô haw :*
         Chasipaw daihti vaw châ ta, a tlâhpipa ta Board exam tah leipa he cha kô chhâ (Final) exam he November thla liata hnei tyhpa châ ta, kô chhâ exam para awpah he angiatiah tlâ ma pi. Eima pass nata pass lei la pachâ chai hlei ma pi, siku kiah byuh leipa ta eima khotalai awpah kha tlao eima tlaichhai chai.

          Exam zy liahsa vaw patlô pi ta, viasa thokhazy cha sâh tai daihti a châpa vâta ama nôpaw sâh taipa ta amâ riena su lyu lâ cha arie pâ lymâ hra ei ta, thokhazy pi deikua eima hawti kaw chypa vâta khiliah palaopalâ cha eim a rai pipa a châ lymâ.

          Mydi nata zâlâ tawhta a zo taihta khiliah liata meipaoh a aihpa hmô awpah hluh kaw ei ta, my noh a vaw chhi pataw nahta lâpi liata nohsa a ei pâ ta hri amo ngâ kawpa nata cha-aw a hao haipazy chhao ama hluh kaw tyh.

           Noh nata daihtizy sie lymâ ta, eima hâdy chaipa Karisama (Christmas) daihti cha a vaw hnia ngaita bâ heih ta. Zawpi, nô nata paw, machâ nata hawti, a chanô chapaw ta eima pachâna cha Christmas lâ sai a heih bâ ta. Tape a hneipazy chata a thapi thei chaina hawhta Lalsangzuali Sailo nata Siampuii zy Christmas hlasapa cha mydi awhkho tawhta vaw pasasa ei ta, ama Battery ta âdaih tiah leipa vâta lâhkha daihmâ taihta pazaopakhy ei ta, ama aikah nohsa liata ama zawh hôlô tyhpazy kha mothlawpa lia a châh thlâh ha tyh.

*Christmas chysia :*
         Reih chiehpa hawhta Christmas a tlô awpah eimâ ngiatiah lei chai tyhna chhâpa cha khâpa hro vâ châ hlei leipa ta, chysia thiehpa hnei daihti hawhta khâchâ pachâna eima hneipa vâta a châ tyh. “Bei Zisu” tahpa tlyma, “Bethlehem Awhsi” tahpazy la eima palôh liata khô hmâ ma pi. Eima palôh liata a lai chaipa cha eima Christmas chysia tlai kha a châ.

          Eima viasa nah cha ama chhôhkha ta bazar lâ apazipa ta ama Christmas chysia awpah cha chalei awpah ta pua tyh ei ta. Amâ vaw dipa cha viasa sahlao zydua ta mokhâh pi ta, ama Christmas chysia mopa awpah cha âmo a hneituhpa nah amâ lyna nata hmô awpah eima byuhna kha â kho thlâh ha tyh aw.

           Ama vaw pachhôpa cha angiatiah lei kawpa ta moh pi ta, âmo eih hawhpa cheingei cha hnei awpah eima khoh tyh hra. Viasa sahlao ta Christmas chysia  âlyupa ta ahneipa chhao ama y tyh hra. Keimo deikua eima rairu kawpa vâta eima mopahâh pasa awpah ama chipa vâta eima nôpaw nahta bazar lâ cha maniah achhi khoh leipa ei ta, viahkao châta eima ngiatlâh zy, chaopasypa châta eima chai zy, pheiky châta eima pheipazah zy cha thairih ta maniah thlie ei ta, âmo ta a mâ nao chaipa heihmo eima moh lei n’awpa ta maniah ama tluapa hnolo tyh hra.

            Amâ vaw di awpah cha angiatiah lei ngaita tyh pi ta, buakha nata buakha heta âmo mohkhâh awpah eimâ thao thlâh ha. Lâhlapi liata a vaw di ei ta, Polythene ta eima Christmas chysia ama vaw chabapa cha va hmô pi ta, ei nawhtazy nah chata angiatiah lei kawpa nata apara kawpa ta a râ pi ta, ama hmo chabapa cha thlai chhu pi ta, eima o lâ eima vaw ngai khei tyh.

         O eima tlôpataw nahta hmo cha thlai pachhi pi ta, eima chysia awpahzy cha thlai aky pachhi lymâ pi ta, eima nôpawzy ta thairih hmâpa ta maniah ama thlie khai hapa vâta eima su thai kaw sai. Eima viasa nah chhao maniah alykhei awpah nata maniah mopa hra awpah ta thlai a vaw ngia lymâ hra ei ta, ochhôh cha alyna thaphana pyu ta a bie thlâh ha tyh.

         Thobyh liata thlai khô pi ta, buakha nata buakha heta pahy pi ta eima moh chanei ngâthlâh ha tyh. Viasa nah ama vaw charei daihti liata chhao thaoh heih, khô heih eima tah ngâthlâh ha tyh pyly. Eimâ ly kaw nota viasazy hneipa eima hnei mâh leipa nata eimâ lyna pakisa thei mâh leipa hmo miakha y ta, cha cha khâpa hro vâta châ leipa ta, ‘PHEIKY’ na eima hnei thei mâh vei.

*Poh Pheiky saihpa :*
       A zo amô awpah ta aziana a vaw paryh pi ta, ei mothlaw liata viasa nah chysiazy nata eima chysiazy cha ei mothlaw liata a vaw lâ heih ta, a thiehpa sai a châ vâta keimo eih a chhie viana rai pahno hlei leipa na ta, ama chaleina mâ chhao pahno hlei hra leipa na ta, pahno awpah khona chhao hnei pyly  hlei hra va na.
 
          Rakhô liata ei pâ nata ei nâ bielôhawhpa ama reipa cha nahthliepa ta ei nahpachôh thlâh ha na ta. Ei nâ chata, _“Mylâ la eima hneipa ma, hnei leipa ma ama pheiky cha tlâ ei kaw mopa tua ei, ama viasa nah heihmo ama mohtu tlamaw aw, a pha viapa eima chalei thei leipa chhaota heihmo a pasa lei n’awpa chhâta, ‘Poh Pheiky saihpa’ chhâ”_ tah ta. Ei pâ chhao chata apyh khei hra ta.

        Mydi eima thyu hlâta ei nâ cha bazar lâ thlai pua ha ta, eima kaw thyupa cha, _“Ei nâ zaw?”_ tahpa ta hiahhrina, ei pâ ta, _“Bazar lâ a pua”_ tahpa ta einâ chhy dâh tawhta hmo yzie cha patu khai thlâh ha na ta.

            Ei nâ â vaw di awpah cha angiatiah lei ngaitapa ta mokhâh thlâhh ha na ta, patinie â daih ha tawh chhao chata charâta a vaw di thei leipa ta, patizy taihta niesai pi ta, dawh 9 a vaw paro rachhôh tawh chata lâhlapi liata â vaw di haipa va hmô na ta, atamy â vaw dipa cha khâpa hmah a ku liata a chabapa hmô leipa na ta, ei tha vaw chhie hmâ kaw ta.

          O a vaw tlô nah chata dusawta heta a sahria liata Poh Pheiky saihpa (Atahmâ daihti liata la Converse nahta apizie âlyu pâ kaw) cha vaw thaoh ta, reihchiehpa hawhta thairih ta eima phei seihnazie maniah a thlie khai hapa vâta maniah asu thai kaw sai. Aly ngaita pi ta, khôtho lâ a kaw râpapua para na ta, ei viasa nah cha kaw chho ei na ta, â mo chhao thlai avaw ngiapa ta miah za mopa hra ei ta.

           Keimo la heih hawhta pheiky phapa chhao hnei thei hra leipaw sih la, poh pheiky saihpa chhâ eima hnei thei mâtâ. Eima viasa hry liata poh pheiky saihpa dâhdei chhao a hnei thei leipa, Christmas noh ta viahkao thiehpa nata chaopasy thiehpa liahsa a vaw tao ha ta, a viahkao a chaopasy liata liahsa hnaoh ha ta, pheiky aky awpah hnei leipa ta pheiruapa ta a ypa chhao ama vaw y thlâh haw. Chanota Poh pheiky saihpa ei hnei theipa kha Khazohpa ngiachhiena vâ tah lei thei va na.

*Awh-ie :*
         Christmas a châ awpah cha a ngiatiah lei ngaita pi ta, chysia thiehpa aky awpah cha eima kho chaipa a châ. My khih vaw deih ta, Christmas my a châpa vâta keimo chhao awhpinô thiepa ta ahmie awpah eima châ. Pati nie awpah chhao angiatiah leipa pi ta, y molo thai ma pi. Liahsa patinie eima tyh tawhta eima ngaizy liahsa miah ama pasi khai tawhta thobyh liata pasô ngaitapa ta eima khôpa, eima Christmas chysiazy cha thaohpa ta aky pi ta, he noh he kôkha chhôh liata eima pathaih chai noh a châ cheingei aw.

           Motota eima sâzy cha tlaohpha ngaita ta, chysia thiehpa akypa ta khô pua awpah nata apakhy awpah ta achhyna o pangai awpah cha a thathyu leipa rai y hra ma pi. Eima o tawh chata amopakia laihna chôta nata viasazy nahta ahmôpara awpah angiatiah lei kawpa ta achhyna o cha pangai laih pi ta, uhthei via eimâ tyhpazy chata maniah avaw ly-ua laih lymâ ei ta, maniah amâ ly-ua dâh chhao â lyu kaw sai. Chysia thiehpa eimâ kypa vâta _"Thiehthieh, thiehthieh”_ tahpa ta maniah vaw diah ei ta, chysia thiehpa eimâ kypa cha eima no lâta vaw za heih ta, adi lilaw awpah khona taihta eima hnei heih tyh.

           Viasa thokha heih cha diah awpah nata aly-ua awpah ama chi vâta chysia thiehpa rairai aky ngâh leipa ama y hra. Thokha chochhie via heihpazy hra ta, maniah ama vaw hmô nahta, _“Khawh, na viahkao thiehpa liata awh-ie â bai thlâh khawh”_ maniah tah tyh ei ta, keimo hrata a thiehpa cha i ngaitapa ta thlai amopakia pi ta, â mo hrata, _“khawh a hnôhky lâ, a kâ lâ awh-ie â bai”_ maniah tah ei ta, eimâ mohpakia nahta thata maniah pahneisao ei ta, noza pasôh viapazy pi cha eima hmia a saih khai ha tyh.

*Ei vâ chai tyh :*
         Christmas daihtizy avaw hnia heih pi ta, hnôhlâ daihti liata nata hawti daihtizy mothlawpa liata a vaw lâ tyh ta, Christmas eima hmâ dâh chhao alyu thai khao vei. Tahmâ cha Khazohpa ngiachhiena zawhzi ta ahyrai byhnâ hluhpi to chyu pi ta, asosâhna nata hmahsiena ta maniah a chadai ta, Computer age liata eima charei ha tawh chhao heta kei la, _*“Poh Pheiky saihpa”*_ daihti kha na ei vâ chai tyh.

Comments










Popular posts from this blog

Mizo Sermon Thar - KHAWVELAH KRISTIAN CHHUNGKUA A PAWIMAWH

(Thufingte 24:11,12)
Thi tura hruaite chu chhan la, thah mai turte chu chhan chhuak thuai rawh.
Rev.C.Thalai __________________________________________________________________
Tunlai khawvelin a buaipui ber chu Zu leh ruihtheih (drugs) hmangin Setana a alo inrawlh a, chuvangin thalai sâng tam tak nitin leh thla tin thihna thlân khûr lamah an liam zo tawh a. Khawvelah an lo kîr leh thei tawh lovang. Tunlai hun hi hmanlaia Aigupta rama fa tir lalthuthlenga thu Pharoa fa tir atanga bawihnu fa tir thlenga an thi (Exodus 11:5-6), ang mai khan tunlaiah chhungkuaah fa u ber atanga fa naupang ber thlengin anmahni duhzawngin an awm vek tawh a. Chuvangin chhungkaw tam tak chu lungngaihna chhûmpui thimin a khuh mek a nih hi. Tunah Bible thu i lo ngaithla ang. "Kan tukverhahte thihna lâwn lûtin, kan lal inahte a lût tawh si a; Pâwn atangin naupang tibo tur leh, khawlai ata tlangvâl tibo turin."(Jer.9:27) ti a zawlnei Jeremian a lo sawi kha tunah hian a lo thleng ta a nih hi. Zu leh ruitheih av…

Naupang Doctor te

*NAUPANG DOCTOR-TE: (Specialists).*

_*1. Dr. Lalhmuchhuaka*_
J.L Medicine chung,Hospital Road
Timing:Zing Dar 7:00 - 9:00 leh tlai dar 3:00 onwards 
Clinic no: 0389-2321242_*2. Dr. C. Biakmawia*_
Life Drug Centre, Hospital Road
Phone: 9862682355
Timing - 6:00 am - 7:00 pm_*3. Dr. Lalremruati Sailo*_ 
Zoram Drug Store, Hospital Road
Phone: 0389-2327676 / 9436142485
Timing: 3:00 pm onwards_*4. Dr. Lalbiakkima*_
Mizoram Health Care, Hospital Road
Phone: 0389-2314523_*5. Dr Samuel Sailo*_
Synod Hospital -Wednesday, Friday, Saturday
Frasers -Tuesday,Thursday
Ph no-0389-2310123
Millenium Centre-Monday, Thursday (1-4pm)
Ph no-9862365304_*6. Dr John Malsawma*_
Synod Hospital - Monday, Tuesday, Thursday, Saturday
Frasers : Wednesday
Ph no-0389-2310123
Millenium Centre-Friday(1-4pm)
Ph no-9862365304_*7. Dr. Chhuankimi*_
Venus Dawr chung, Upper Bazar.
Timing: 3:pm onwards
Clinic No-0389-2324780_*8. Dr. Mahriati*_
Alpha Hospital, Kulikawn.
Timing: 11.30 A.M - 2.00 P.M
Clinic No-0389-2300535_*9. Dr…

NIOS hnuaia D.El.Ed Scholarship

*NIOS hnuaia D.El.Ed  zir tura in register enrolment no nei te, Private-a thawk zawng2 te tana hriat tur*:  Mizoram Scholarship Board chuan D.El.Ed  private (Non-Govt.) a thawk te tan Scholarship portal ah online-a scholarship an dil ve theih na turin Mizoram Scholarship Board Secretary hnenah Pi D.Ramdinthangi, Jt.Director, SCERT & State Nodal Officer NIOS chuan dilna a thehluh hmangin hmalak mek a ni a, hemi chung chang ngaihtuah turin 20.10.2017 hian Mizoram Scholarship Board hotute an thukhawm ang. Chuvangin D.El.Ed NIOS-a in register private-a thawk zawng2 te (in-service Govt. teacher ni lo zawng te) chuan online-a dil ve an phal anih thut pawha in lo in rinlawk nan Income Certificate angai dawn tih kha in lo hre lawk bawk anga, last date hi a pangngaiah chuan naktuk 20.10.2017 (Friday) hi a ni tawh a, engpawhnise, an extend dawn leh dawn loh pawh thuchiang nghah mek ani e. Thuchiang lehzual a awm hunah kan rawn notice leh dawn nia. (Hei hi a hma atang  tawh khan zawhna leh s…