Skip to main content

Rev C. Thalai hnohta châpaphao lâhâhpa

 (Open Letter to Rev. C.Thalai)
-      From Laicho Nôtlia

Krista châta sei ngâchhihpa,

Na zi Beipa Zisu Krista O lâ na di hlâta na sapa mo cheingei ta he châpaphaopa he na rei awpa ei khoh tu hapa vâta bâh vaw reih papua tua ma y. Thi tawhta thâchhie-thâpha â reipa hlâta cha hro noh chhôh cheingei ta reipa he a phapata ei pahnopa vâ a châ.

Na châbu ropa, ‘Ka Khualzinna ram’ eina present-pa chi kha vaw reih papua na ta, ei palôh eina hria kawpa vâta reih papua chanei heih na ta, khatita ma cha ei reipapua chanei heih thlyu aw. Khizaw he â duah chy awpa a châ khiahtala Marasaw thyutlia avaw y lymâ awpazy ta reih chyu ei sala ei tah kaw. Na chakaona kyh liata ngâchhihna hro, reingiahna hro, nawhna hro, kyhpachâna hro nata Pastor châna a pahnopasiana hro zydua he na chakaih tahpa hmô na ta, rônah ei cha tah hmeiseih. Krista thâtihpha nahthlie awpa ta, a reithaina hla sa awpa ta nata ano lâta thlahchhâ awpazy ta hruatuhpa (Dawhparohtuhpa) rai tawhta avaw thao chi ta, S.K (Satlia-Kaona) py vaw chhihtha chi ta, Khihchhôh Machâ tawhta Village Pastor kaw châ lymâ chi ta, Kraws pheisaih na châ tawhta a rei leipa liata thâtihpha chho awpa ta Burma râh lâ thlai tuapa châ chi ta. Reingiah ngâsâpa ta nâma deita chhao châ leipa ta, na pôhpa tlawrakhapa (lahpinô) chhaota na khih nata râh puasaipa ta sie papua chi ta; palôh liata Abara nata Sarai-zy amâ vaw lâpâ ngâ kaw. Na sie chyta pasyuna bie a reituhpa Rev. Chhôhlei ta Biehrai bie a reipa, “Na râh tawhta nata na heih-nawh tawhta nata na paw O tawhtapa pua la, râh ei cha pamosa awpa lâna chata sie teh” (Âthaona 12:1) tahpa bie he nâ hmie ngâsâpa ta ei cha pahno.

Kô 1955 tawhta Pastor ta chahnao pa-ipa (Ordained) vaw châ chi ta, kô 49 chhôh Pastor rai na hria tawhta kô 2002 liana khata vaw pisih (Pension) chi ta. Atanoh taihta miah na hrolâh chypa he keima heta la ei ly ngâsâ. Na vaw chakaolâh penawh Reverend 24-zy ta Krista O lâ châ di sai khai ha ei ta, nâma deita ta he lei chhiesapa râh liata na charei chypa he na y ru aw ta, na palôh chhao â lie kaw na ta ei cha pangiasa.

                    ‘Ei hmia lia haosâ khih ngiapa a y,
                    Tlô ngiatiah va khihpi ngia cha;
                    Lôhkhy zydua a kina su,
                    Hmô byuhpa ta sai na ai vei’,
 tahpa hla he a ru lâta raithlih chôta na sa ngâ tyh aw na ta ei cha pangiasa.

Lyuhchâpa Pawla ta, “Thâtihpha he a daihti liata chhao; a daihti leipa liata chhao chho ngâthlâh ha awpa a châ,” a tahpa hawhta, na Pastor daihti chhôh lia dei châ leipa ta Sermon khazie lei châ ma roh chi ta, raihpâ chi ta, thâtihpha chhona rai dei he thikhei hrokhei tlâ nâ chhuah bao! Vârâh khihnarâh liata ryu nâ pachôpa he khazie lei châ ma châ aw bao vâ he! He lei râh liata luh nyuna awpa O nata lyu, sôh nata thih kyh liata Pastor hropazy hawhta hnei hra vei la, chô lâ tawhta châ saituhpa vârâh zawpi reitiahleizy ta la, hneirô chaipa tlao ama cha tah thlyu aw. Râh kyhpachâna hmeiseihpa a hnei leipa, ahlaopa Politician thokhazy yzie nata siezie hâ â lapa ta Pastor thokhazy cha, awnanopa mietakuzy chakaochahlâh awpa hlâta cha, atahmâhlâ khizaw a tlaichhaina ta ama palôhzy bie khai ha ei ta. Dema chhao kha khizaw a tlaichhaina vâta a chakaolâhpa Pawla cha Thysalawnika khih lâ a siesai hapa kha eima pahno (2 Timawthy 4:10).

Nâma deikua cha, châ awtuhpa pahnopasia chi ta. He vâta 3rd April, 1955 liata Rev.AB Lorrain Foxall ta Lorrainville Achhyna-O liata Pastor châta a cha chahnao pa-i (Ordained) nota bieryu a cha hihpa, “Atanoh tawhta cha Pastor ei châ haw, tahpa he my kha y” tahpa ta ei no (2) lâta a cha chho na HRO châ chhituhpa a châ, tahpa na reipa he a rônah ei tah ngai ta.

Kô 49 chhôh pheisai ta na bia chahlô chi ta, ei kha na thaopa he thla kha, thla no hlei zy ryu tyh chi ta. Sao nata chhiah, vâsua-nohsa, tilai-thopawpazy a pakhâsa leipa chi ta. A châhta nodi dâhphipa ta, thachhâ panaopa ta na y tyhpazy, china thlahzohna chôta a leithei leipa vâta ti laipa chaka chi ta, tily ta cha phaoh ta; châhrasala châ tuahtuhpa kû thatlôpa ta a cha patupa vâta thina khôkhâh chi ta. Chano-chahaw chopa tawhta khôkhâh hmâ awpa ta y hmo cha  paryhpa ta. Sahrâpa pakah tawhta cha pachha ta, he châ vaihtuhpa he Dania nata a viasazy meipi nata chakeihbarôhneipa pakah tawhta a pabohsatuhpa pyly kha a châ tahpa eina patheisa chanei heih chi. Kô 1968 liata thâtihpha na chhopa vâta Burma sawhkhâ ta lô-O liata cha patâh ta; châhrasala no-âhchhih kawpa ta lô-O tawhta na pua heihpa chhao he, Abeipa vâlyuhchâpa ta Pity lô-O tawhta a papuapa (Hmotaopazy 12:4-11) nata ânanona a ypa ta pahno hra va na. Na chakaona thatih kichopa ei vaw reipa heih hra ei pahnei chhi ngâsâ chi ta, na heihvi-heihvâna thâtih na reipa heih hra ei pahnei chhi ngâsâ heih tlô. Rev.Liangkhaia ta, “Khazohpa awna pahnopasia leipa ta Pastor rai hriapa cha rai khochhih lei chaipa na a châ” a tahpa he a do ei tah ngâsâ hra. Na biereipa sâkha, “Pastor rai he sei rai châ ha ta.Sei ta cha a puhpa bie âko-âtlâ tlymâ a zyh awpa tla a cha. A ei khiata cha a puhpa sei tlâhpa a châ vei. Pawla chhaota, ‘Krista sei’ a tah ta. Pity chhaota ‘Saimaw pity Zisu Krista sei’ a tah hra ta’” tahpata na reipazy kha reingiahna hro na hneina chhâ a châpa ta ei pahno. Pastor thokha Headquarters bie chakhia tyhpazy ta he he pahnopasia chyu ei sala ei tah kaw. Atanoh eima Pastor sahlaozy, nâma hawhpa he pakhazie tlaima y aw vâ ei he?

Na hro liata reihchhona (Comment) a pietuhpa hluhpi hry liata thokha biereipa he rônah ei tahpa vâta ei vaw roh chanei tua aw. Machâ C.Zohupa ta, “Kan Kohhran Pastor zingah chuan inngaitlâwm ber leh thawkrim ber a ni hial âwm e” tah ta. Rev.C.Rosiama, Sr.Executive Secretary, Mizoram Presbyterian Synod ta, “Mizoram Pastorte zingah chuan ‘Isua Krista chhiahhlawh’ti a koh tura zahpuiawmlo pâwl tak a ni âwm e” a cha tah hra. Rev.Dr.H.S.Luaia ta, “Amah ang hlîr hi Kohhran hruaitute hi ni ila” tahpa ta a cha reihchho (Comment) hra. Rev.Dr.T.Laikai ta, “Kan ECM Pastor tha berte zinga mi a ni” a cha tah hra. Rev.K.Lianzuala ta, “Pastor ka hriat tawh zingah inngaihtlâwmna lama Lal Isua ang teuh ber niin ka hria” a cha tah hra chuh. Synod nata Baptist Pastor hluhpi Comment-na tlâhpipa cha, ‘Pastor hry liata â reisi chaipa, tiama chaipa nata rei ângiah chaipa’ tahpa ‘Title’ sâthôh (3) lakho he ama cha pakho khai ei. Keima tlai ta chhao heta, he ‘Title’ he nâ phuh (deserved)-pa ta ei pahno hra.

Atanoh cha eima râh liata chhao byhna a thata to pi ta, thyutlia châthaihpa hluhpi hnei pi ta, sawkhâ rai hra hmô thei’pa avaw châ khao leipa vâta chyhsa hluhpi cha râh kyhpachâna vâta chhao châ hlei leipa ta Politics Field â ngiapa nata Rev Liangkhaia reipa hawhta Khazohpa awna pahnopasiana hnei tlô leipa ta Pastor rai liata â ngiapa ama vaw y hôlô. Cha hawhpa chyhsazy cha Politics nata awnanopa liata tiamana hnei leipa ei ta, ngâchhihna nata reingiahna hnei leipa ei ta. Pastor thokha cha siku hyutuhpa thokhazy hawhta ama bia lia chhao y hoh leipa ei ta, ama bia buah karie hapa chhao chahlô-cha-ei hoh leipa ei ta, Headquarter liata nata khihpi viapa liata y awpazy tlâ amâ chhu. Krista Awnanopa mietaku sahlaozy kyhpachâna hnei khao leipa ei ta, âmo chhôhkha O nata lyu, khihsâtôhtuna deita tlâ a pachâ ei ta, siku hyutuhpa thokha, ama yna su liata y hoh leipa ta, Siaha khihpi lia saita a y penawh hawhta Siaha lia saita tlâ a y khohpa ama pôh via ngâkaw.

Nâma deikua cha, na chhôhkha, O nata lyu, hneirôna nata nohâh ynazy cha khâpa sisawta rao leipa chi ta. Chôlâ tawhta awna ao na pahnopasia vâna chata Krista pachhana thâtihpha deita he thikhei-hrokhei awpa ta hro nâ vaw pie bao! Châ awtuhpa palôh cha a tlâh muarua chaimâh tlai aw. Khizaw puasaipa ta na chakaopa Krista O lâ nâ di tita vâsu hawka liata Krista thisaih vâta pachhapa saw hluhpi nata vâmo sahlao reitiahlei ta dyna Prokre ama tao n’awpa dâh kaw rohpady chaimâh na ta, ei cha uahva chaimâh. Banner lai ngâsâpa liata, “Rev.C.Thalai, Krista Sei ngâchhihpa, tiamapa nata reingiahpa, eimâ châ ly na, na Paw lyna liata a ngia teh” tahpa he ngôh pahupa ta vaw roh aw ei ta, na hla taopa rônah ngâsâpa, hla nuby 339-na, tlâh chhânapa,
                    “Chakaona rai rônah chaipa cha,
                    O nah lyu nah chhôhkhazy siesai ta,
                    Khizaw liata tovyuh â pakypazy,
                    Bei Zisu zituh hmeiseih châ ei”
tahpa hla he, vâ hlapy reitiahlei ta ch’aw paryh p’aw ei ta, lakho hneituhpa Krista ta na luh lia, lakho cha a vaw pakho aw ta, aw...a rônah awpa zie cha, chyhsapa paleih ta la reih thai awpa châ vei. Nâma ta hla na sa awpa ei pangiasapa cha,
                    “Topa Bei lakho hlâta,
                    Ei pasô pietuhpa (Krista)
                    Khih parônahsatuhpa,
                    Mietaku (Zisu Krista) a châ’
tahpa he a reisi kawna chôta nâ chhyna a châ thlyu hra aw. Tlâh parei chy ma y...!


Comments

Popular posts from this blog

ABeipa châta chyhsa rônahpazy thâtih

Rev. C. Thalai

Spurgeon zy, D.L. Moody zy, Billy Graham zy he ama hawsaih no tawhta ama nô nawhzy ta Khazohpa bie, thlahpa lâ sâhpiti ama vaw mohôhpa nata palaiseihsapazy ama châ. Chavâta Khazohpa bie cha ama thlahpa pati châta ama vaw nie hawpa a châ. Atahmâ Bible bie tawhta eima nahthlie tua aw. “Hawsaih a pih thiehpazy hawhta Thlahpa lâ sâhpiti, khâpa hmah ahlao leipa cha vâ teh u, chaliana chata pachhana tlohna taihta nama laiseih thei n’awpa ta” ( 1 Pity 2:2) he bie he ama thisaih liata ama vaw laiseihkhei hawpa a châ             D.L. Moody cha my chareih ta dawh 4 ta thyu ta, dawh 1 chhôh Bible rei n’awpa ta a daihti a hmâh tua chai tyh tahpa a châ. Spurgeon cha Bible ei 100 a reih papuapa châ ta, ei zakha a reih papuapa cha, “A thiehpa hawh sai ta ei nie tyh” tahpa ta a reih. Richard Wurmbrand ta he hawhta bie rônah ngaitapa a reih hra. “Krizyhpa châ na ta, chakaotuhpa chhao châ na ta atah tlôh ta, rietheina, rairuna atyh beih leipa chyhsa cha chyhsa vâdua chaipa nata ngiachhi a…

Varah cha rietheipazy rah a cha

VARÂH CHA RIETHEIPAZY RÂH A CHÂ Rev. C.Thalai
“Unawh kho ngaitapa saih u, pachâ teh u, rietheipazy he angiapâna liata a rôhnah awpanata ano kyhpachâtuhpazy hnohta a taihpa râh a totuh awpazy ta rao vei ma?” (Zami 2:5). Abeipa ta ano moh vâta riethei a taotuhpazy nata rairuna a tyhpazy châta “ryu to a rao thei leipa, apuapa a hlao leipa, alo thei leipa, avâ liata nama châta a khaipa cha hmô awpa ta” tahpa ta Bible ta maniah a chho (I Pity 1:4). Atahmâ Bible ao khochhih ngaitapa tawhta eima nahthlie heih tua aw. “Hezy he riethei pasana tawhta a puapa sahlaozy kha ama châ; ama pohzy Mietahkupa Taw thisaih ta pasupa ta ama pangyuhsa haw” tahpa ta machâ hryta pakha ta a vaw chhopasia haw (Biph.7:13-14). Abeipa Zisu chhaota, “Ahyrai na zi awpa a khoh khiahta cha riethei tao papeisa leipa ta nohto kraws a pupa ta na zi mawh sy” a tahpa a châ. Lyuhchâpa Pawla cha Abeipa moh vâta rietheina nata taolana a tyh hluh kawpa a châ. He hawna heta- “Ei hluhpi ama chhei khai tawhta patahna o liata khô ei ta…

Apalaina

A PALAINA (VYUHTUAPA) HNEI TUANA -Rev. C.Thalai Kô 1949 January Iana Pakhypi hnôhchaipa tawhta Presbytery hneipa châ sala, tahpa châ ta; Presbytery hnei n’awpa chhao cha ‘Saikao Headquarters liata châ mawh sy’ tahpa a châ. Adaihti March 15, 1949 a châ. Chairman hmiatua chaipa he Machâ Khikô (Sawlawmaw paw) a châ. Ryurei chhôh zydua cha, â dua sai  ta â duahpa ta ryureina a chhihtha. Baptist Awnanopa tawhta Vyuhtuapa (Palai) a khy penawh cha Rev. Challiana Murray nata Lyuchâpa (Tirhkoh) Khuma zy ama châ. Rev. Challiana ta ryureina nata phôh zydua maniah chho ta, a biereipa khaihna tawhta hmahsiena thata maniah a piepa ta pahnopa a châ. Moh yzie  Presbytery tahpa he Baptist-nah chhaota kô reipi ama vaw tahpa a châ hra. Kô 1959 Lunglawn Presbytery keima Palai ta ei sie kô tawhta Assembly tah awpa tahpa a châ. Kô 1960 tawhta cha Assembly tahpa a châ. ECM chhaota Kiasie Assembly 1961 tawhta Assembly tahpa a châ hra. He kô liata Chairman cha T.Bilhranga a châ. Baptist tawhta Palai â khypa Rev.D…