Skip to main content

MÂTYZY THÂTIH


-      Rev C.Thâlai

Matyzy thati he Angiapâtuh penawzy ta ama thina thati he ama nahthli khohchaipa nata ama pazôh chaipa a châ tyh. Chavâta Sam arotuhpa chhao chata “Amopathaihpazy thina cha ABEIPA pachâta a sôh ngaihtahpa a châ” tahpata maniah a chho (Sam 116: 15).

Bible liata Mâty hmiatua chaipa cha Abela a châ. Kaina chata a nawhta Abela hnohta, “Lyu lâ sie suh vy” tah ta. Lyu liata ama y nota Kaina chata a nawhta Abela cha thyuhnao ta; thie ha ta. Chatanachata, Abeipa chata Kaina hnohta, “Na nawhta Abela kha zaw” tah ta. Ano chata, “Pahno va na. Ei nawhta a vaihtuhpa ma ei châ” tahpa ta âchhy ta. Abeipa chata, “Kheita na tao haw? Na nawhta thisaih ao chata a lei tawhta eina aw mâh tâ” Abeipa Khazohpa ta a ta. (Gen 4:8-10)

Biehrai Thiehpa liata mâty tuachaipa cha Machâ, thlahpa ta biepa, Stiphana a châ. (Hmotaopazy 6:12; 7:58-60)

Rawma sawhkhâ ta Krizyhpazy a taolana kyh.

Sâkhana liata, Krizyh penawh cha khih liata aru lâta ahmôpakhy tyh ei ta; Committee ama hnei tyh. Ama committee bie cha, ‘Kaisara pabâ ta, abei hropa Zisu cha Abei ta tao amâ chhuah’ tahpa bieruapa ama pareisa.

Sânona liata, ‘Krizyh penawh cha Rawma kyhpachâ vei ei. Rawma pheisaih châ awpa khoh vei ei. Rawma sawhkhâ biehneina ry liata y awpa khoh hra vei ei. Khihpi mohôhtuhpa Committee lia chhao a hlao khoh vei ei’. Hezy vâna heta Rawma sawhkhâ kyh apachâ leipa hawhta ama baipa a châ.

Sâthôhna liata, Krizyh penawh cha pasaina leipa ta ahmaohpakhy tyh ei ta; Abei zâpati (Sakramen)-zy chyhsa hropazy hmô leipa liata chyhsa sapa niepa hawhta ama bai. Cha dei châ leipa ta, chanô-chapaw châna kyh liata moleipa hawhta ama bai hra.

Sâpalihna liata, Krizyhpazy cha, ‘Rawma sawhkhâ phôhryhpa achhy khoh vei ei. Nohthlahpa Khazohpa khoh hra vei ei. Abei chaipa Kaisara cha Khazohpa ta achhy leipa ei ta, theihthaipazy chhao khâpa sawta sa vei ei,’ tahpa ta biedoleipa ama pareisa.

Sâpangawhna liata, Rawma râh Khazohpa hie apahâhsatuhpa hawhta ama bai. Rawma chhôh liata chhiena chi nano nanopa, chakâhna, tilaipa nata lohsihpa avaw tlôpazy avaw y na ta, Krizyh penawhzy cha Rawma Khazohpa palôh ama patlâh leina ama pahno na ta zy, chhiena rarô ypazy avaw tlô khiahta cha Krizyh penawhzy ama bai thlâh ha tyhpa a châ.

Sâcharuna liata, Chyhsa hropazy ta thâtihpha amâ ngiapâ thei n’awpa ta Krizyhpazy chakaona cha angiapâ lei penawh ta amâ hao kawpa a châ.

Sâsarina liata, Krizyhpa ama châpa vâta taolapa ama châ. Rawma sawhkhâ chata Zu phôhryhpa ama pahno kawpa a châpa vâta khotalaina ama piepa a châ. Krizyh penawh deikua cha athiehpa ama châpa vâta apyh vei ei. Chavâta, Krizyh penawh cha ryhpa khôtho lâta a ypa châ ei ta, kheihawhpa daihti liana chhao hmahta, kheihawhpa su lia chhaota taola lymâ awpa tahpa ama châ.

Taolana hmiatua chaipa cha 64 AD liana khata a châ. Cha cha ‘Abei chaipa Nerô ta Rawma khihpi cha mei ta rao ta,’ tahpa ta reipa a châ. Châhrasala, Nerô chata ‘Krizyh penawh ta ama rao’ tahpa a rei. Chatawhcha, Rawma khihpi liata Krizyh penawh cha patu ei ta, lô-O liata khô ei ta, chyhsa hluhpi khaipâ ei ta; chyhsa hluhpi mei ta ama rao. He taolana kyh liana heta, Pity cha âlielâ ta khaipâpa a châ. Pawla deikua cha, Rawma chyhsa châna a hneipa vâta khaipâ leipa ei ta, a luh ama taipa a châ. Mâty ta a thi penawh ri cha lapakhy ei ta, mei ta ama rao. Apaohpadipa cha Rhine chavah liata hiezawh ei ta, pahneisaopa ta, ‘Atahmâ ama sapazy cha a thyu heih hmeseih ma?’ ama ta.


Beichaipa biepiepa cha he hawhna heta a châ : -

1.   Krizyhpa achhyna-O parao khai awpa.
2.   Bible nata Krizyhpa châbuzy cha parao khai awpa.
3.   Awnano penawh chhaichhi pathaihpa chhu khai ha awpa.
4.   Krizyh penawh cha Khazohpa achhy lei awpa tahpa a châ.


Biepiepa ama phuah tawhta daihti rei leipa liata ‘Theihthaipazy patu khai ha awpa,’ tahpa châ ta. He daihti liata taolana he Rawma notla lâ cha kô 3 chhôh ô ta; nochhi lâ cha kô 10 daihmâ a ô. Chavâta, Krizyh penawh cha ama tao ngâsâ. Angiapâ apaphasai kholeipazy cha ama ku nata pheizy taipachhô ei ta; ama mohlô chakhei ei ta; ama nahkao pahlai ei ta; achhyna-O suzy nata ama Bible-zy ama chhu khai haw.

He hawhna heta Rawma râhchhôh nata khôtho lâ taihta Krizyhpa taolana su hluhpi liata â pôh lymâpa a châ.

Taolana he Abeipa Zisu chhaota avaw reih chhielie khai hapa a châ.

“Pachâ teh u, changie hry liata, mietakupa hawhta ei cha tuah ei hih. Parihzy hawhta so u la, vachhuhzy hawhta nônaipa ta y teh u. Chyhsazy liata a chado teh u. Ryureituhpazy ta cha patusa awpa ei ta, amâ pakhyna-O zy liata ama cha patu aw, Keima moh vâta biehneituhpazy nata Abeizy hmiakô liata amâ châ chhi aw” (Mathai 10:16-18) liata Abeipa Zisu ta maniah chho chhielie khai hapa a châ. Atahmâ he khizaw su hluhpi liata Krizyhpa taolana pôh via lymâ ta; mâtyzy thisaih a loh ngâhai, a loh via lymâ hra aw.



ZISU PACHUPAZY THINA DÂH

1.   Saimaw Pity thina dâh – Rawma khihpi liata âbôkalie lâta ama khaipâpa a châ.
2.   Adaru cha Kraws liata athina taihta khawhri/ chaori ta chahrypa a châ.
3.   Zamie cha Herawdâ ta zaozi ta a luh apataisapa a châ.
4.   Zawhana cha, sathawh sah ngaitapa liata thla ei ta, châhrasala, thi leipa ta, Ephisi khih liata pihthi ta a thipa a châ.
5.   Phili cha Phrugia Hierapolis liata savori ta a thina taihta ama pa-aosaopa a châ.
6.   Bathawlawmu cha a hroh thlâh hana chôta a vo hlaipa ei ta, a thipa a châ.
7.   Thawma cha India râh Coromandel liata sei ta â chô ei ta, a thipa a châ.
8.   Mathai cha Ethiopia râh liata zaozi ta amâ chôsaopa a châ.
9.   Zamie, Alaphu sawchapaw cha Achhyna-O laki tawhta chatie pathla ei ta, a thi hapa a châ.
10.                Thadia cha Persia nata Assuria râh liata thâtihpha a chho nota
        ama thipa a châ.
11.                Saimaw cha Kraws liata ama khaipâ.
12.                Zudâ Iskari deikua cha anosasyh ta â pa-aosaopa a châ.

Hezy he Zisu Pachupazy thina dâh zy cha a châ.


Comments

Popular posts from this blog

ABeipa châta chyhsa rônahpazy thâtih

Rev. C. Thalai

Spurgeon zy, D.L. Moody zy, Billy Graham zy he ama hawsaih no tawhta ama nô nawhzy ta Khazohpa bie, thlahpa lâ sâhpiti ama vaw mohôhpa nata palaiseihsapazy ama châ. Chavâta Khazohpa bie cha ama thlahpa pati châta ama vaw nie hawpa a châ. Atahmâ Bible bie tawhta eima nahthlie tua aw. “Hawsaih a pih thiehpazy hawhta Thlahpa lâ sâhpiti, khâpa hmah ahlao leipa cha vâ teh u, chaliana chata pachhana tlohna taihta nama laiseih thei n’awpa ta” ( 1 Pity 2:2) he bie he ama thisaih liata ama vaw laiseihkhei hawpa a châ             D.L. Moody cha my chareih ta dawh 4 ta thyu ta, dawh 1 chhôh Bible rei n’awpa ta a daihti a hmâh tua chai tyh tahpa a châ. Spurgeon cha Bible ei 100 a reih papuapa châ ta, ei zakha a reih papuapa cha, “A thiehpa hawh sai ta ei nie tyh” tahpa ta a reih. Richard Wurmbrand ta he hawhta bie rônah ngaitapa a reih hra. “Krizyhpa châ na ta, chakaotuhpa chhao châ na ta atah tlôh ta, rietheina, rairuna atyh beih leipa chyhsa cha chyhsa vâdua chaipa nata ngiachhi a…

Varah cha rietheipazy rah a cha

VARÂH CHA RIETHEIPAZY RÂH A CHÂ Rev. C.Thalai
“Unawh kho ngaitapa saih u, pachâ teh u, rietheipazy he angiapâna liata a rôhnah awpanata ano kyhpachâtuhpazy hnohta a taihpa râh a totuh awpazy ta rao vei ma?” (Zami 2:5). Abeipa ta ano moh vâta riethei a taotuhpazy nata rairuna a tyhpazy châta “ryu to a rao thei leipa, apuapa a hlao leipa, alo thei leipa, avâ liata nama châta a khaipa cha hmô awpa ta” tahpa ta Bible ta maniah a chho (I Pity 1:4). Atahmâ Bible ao khochhih ngaitapa tawhta eima nahthlie heih tua aw. “Hezy he riethei pasana tawhta a puapa sahlaozy kha ama châ; ama pohzy Mietahkupa Taw thisaih ta pasupa ta ama pangyuhsa haw” tahpa ta machâ hryta pakha ta a vaw chhopasia haw (Biph.7:13-14). Abeipa Zisu chhaota, “Ahyrai na zi awpa a khoh khiahta cha riethei tao papeisa leipa ta nohto kraws a pupa ta na zi mawh sy” a tahpa a châ. Lyuhchâpa Pawla cha Abeipa moh vâta rietheina nata taolana a tyh hluh kawpa a châ. He hawna heta- “Ei hluhpi ama chhei khai tawhta patahna o liata khô ei ta…

Apalaina

A PALAINA (VYUHTUAPA) HNEI TUANA -Rev. C.Thalai Kô 1949 January Iana Pakhypi hnôhchaipa tawhta Presbytery hneipa châ sala, tahpa châ ta; Presbytery hnei n’awpa chhao cha ‘Saikao Headquarters liata châ mawh sy’ tahpa a châ. Adaihti March 15, 1949 a châ. Chairman hmiatua chaipa he Machâ Khikô (Sawlawmaw paw) a châ. Ryurei chhôh zydua cha, â dua sai  ta â duahpa ta ryureina a chhihtha. Baptist Awnanopa tawhta Vyuhtuapa (Palai) a khy penawh cha Rev. Challiana Murray nata Lyuchâpa (Tirhkoh) Khuma zy ama châ. Rev. Challiana ta ryureina nata phôh zydua maniah chho ta, a biereipa khaihna tawhta hmahsiena thata maniah a piepa ta pahnopa a châ. Moh yzie  Presbytery tahpa he Baptist-nah chhaota kô reipi ama vaw tahpa a châ hra. Kô 1959 Lunglawn Presbytery keima Palai ta ei sie kô tawhta Assembly tah awpa tahpa a châ. Kô 1960 tawhta cha Assembly tahpa a châ. ECM chhaota Kiasie Assembly 1961 tawhta Assembly tahpa a châ hra. He kô liata Chairman cha T.Bilhranga a châ. Baptist tawhta Palai â khypa Rev.D…