Skip to main content

Mara Sermon - BEIHVITUHPA PAKHONA BIE PEIMAWHPA

Zeremiah 18: 1-4

Rev.C.Thalai

ABEIPA tawhta Zeremiah hnohta bie avaw tlôpa chata : “Thyu la, beihvituhpa o lâna chata zu la cha liana chata ei biezy ei cha pahnosa aw” tah ta. Chatanachata beihvituhpa o lâna chata zu na ta, beih taona ahlôpa liana chata vaw hria ta beihlei ta beih a vi haipa cha a pha leipa khiahta cha, beihvituhpa chata a pha a tahnazie hawhta beih hropa lâta vi heih tyh ta” tahpa bie he, yzie ahneipa, a thuh ngâsâpa a châ. Chavâta palôhru hmeiseihpa ta eima pachâ khiahta cha, Khazohpa hmotaotheituhpa a châna a sia ngâsâpa ta â lâ aw.
          Chyhsa cha keimo khota nô pyh chhôhta tawhta avaw pihpa châ leipa pi ta, keimo khona daihti liata a thi awpa châ hra ma pi. Hro pasihpa he khoh kaw hra ei sih la, keimo khopa hawhta eima hrona pasihsa thei hra ma pi.
Chavâta chyhsapa pi cha keimo sasyh ta chyhsa ta a tao thei leipa pi ta; chavâta Abeipa Khazohpa chhaichhi nata hmobaoh deita eima chânazie a my kha ei suh u.
ABEIPA Khazohpa cha rônah ngaitapa châ tlô ta; khazoh zydua chô liata Abei rônah ngaitapa a châ. Ano ku liana chata lei su a thuh ngaitapazy cha y ta; Ano ku liana chata tlâh laki a sâh ngaitapazy ano eih châ hra ta, tilaipi he ano eih a châ, a vaw tahpa a châ. Alei hipa chhao he ano ku ta taopa a châ” tahpa bie rônah ngaitapa Khazohpa kuzô thainazie Hlazy 95:35 liata maniah a chho. A hmotaotheina zydua he no-âh tah thlâh ha deileipa ta cha pakah nata paleihta reihtiahpa châ vei!
Tilaipi chhôh liata hmohrohneipa chi nano chi to nata alei hipa (tlâh) lâta apahrâpa hmohrohneipa lôvâpa chi to zydua he a chyh chaipa tawhta alai chaipa nah zy taihta Khazohpa ryraona nata hmotaotheinazie he no-âh tah thlâh deileipa ta cha, rei pha thei’pa châ vei! No-âhchhihpa sai a châ.

Khazohpa cha khizaw nata a chhôh liata hmo zydua ataotheituhpa a châ.
Khazohpa cha hmoto zydua ataotheituhpa châ ta, a khoh khiahta cha nâma nata keima chhao he lô nata tho lâta maniah a tao theituhpa a châ. A khoh khiahta cha mochaopa khizaw noh khaihpa hmô leipa ta maniah a tao theituhpa a châ.
A khoh khiahta cha nahpâpa ta maniah a tao theituhpa a châ. A khoh khiahta cha pheisypa nata kusypa ta maniah a tao theituhpa a châ. A khoh khiahta cha eima pôhpa zydua ta aphawhpa ta maniah apa ysa theih thlâh ha awpa a châ hra.
He khizaw riethei rairuna chi nano nanopazy thâtih eima vaw thei khaipazy tawhta nâma nata keima he Abeipa Khazohpa lâta alynabie rei lei theipa châ ma pi. Atahmâ he eima biepipa baotuhpa châta he hla he eima vaw hrua tua aw.
Chyhsa hneipa sôh nah piah na hmô nota,
Krista ryu châ taihpa cha pachâ ma y;
Sôh ta chalei thai lei byhnâzy reih la,
Vârâh lia na lymâ nata laihna chhao.
                    Byhna reih la miakha miakha ta,
                    Byhnâ reih la Khazoh cha piepa;
                    Byhnâ reih la miakha miakha ta,
                    Khazoh cha ngiachhizie na no-âh aw.

Atahmâ cha Davi ta Abeipa Khazohpa a reithainazie Bible tawhta eima nahthlie tua aw.
Hlazy 8:3,4 liata he hawhna heta : “Thlâpâ nata awhsizy na raopa he ei pachâ châhna heta: chyhsapa he khâpâ châ ta ma khâ na hmô thlâh ha tyh tly ei tah tyh”, abeipa Davi ta a tahpa hawhna heta Abeipa Khazohpa ta nâma nata keima kyh maniah pachâna he my leipa ta maniah â theithlâhpa a châ hra, tahpa he my kha ei suh vy.
Khazohpa cha reithai tlâh nata palyupalih tlâh a chânazie.
Hlazy rohtuhpa ta he hawhna heta hla ta a vaw phi : ABEIPA cha a siana vâta a chôta alynabie rei aw na ta, ABEIPA chônôchaipa moh reithaipa ta hla ei sa aw” avaw tahpa a châ. (Hlazy 7:17).

Pawla nata Sila chakaona
“Zâcho ta Pawla nata Sila cha thlahchhâ ei ta, hlazy sa ei ta, chyhsa atâhpazy ta nahthlie ei ta, sôkhata a lo thata avaw sih ta, Patâhna O lôbôzy taihta a chalyu ta: o chhi zydua thlai apahy ta. Chyhsa tokeihrai daipazy cha avaw thla khai ha ei ta” tahpa ta Bible ta miah a chho (Hmt.16:25,26).
Atahmâ, thyutlia daihti liana heta, hlapy pha ngâsâpazy ta Abeipa reithai nawpa ta Music nata totâ pyungia ngaitapa chhaota eima chakaona hla pyuzy heta Sâtâ seichâna thizohna liata â tâhpenawhzy, sahma nata paritheipa (thohna) ataopenawhzy, Sâtâ ta ama pua thei lei nawpa ta keihraih khâchâ a dai ha penawhzy he eima hlasapa pyuta a papua thei hra ei ma? Eima hlasapa he keimo mohpathâh n’awpa nata alâluah nawpa ta a châ thlâh ha khiahta cha, kyhpachâna hmotaotheina yleipa aw ta, mopakha Solo-na chhao he yzie hnei hra aw vei. Lyuhchâpa Pawla ta “Chiahmie tôpa yzie a hnei leipa” nata a pakhopâpa hawh deita a châ awpa a châ. Chavâta asohsi kaw awpa a châ. (I Kawr 14:8).

Hlapy arairunazie ei pahno thlâh hapa cha he hawhna heta a châ.
Dr. Pa-ô (L) ta he hawhta a reih: Zâ ta mokuh saih pi ta thopi nata viahchhâzy niedopa châ ta, eima daihti sôhpazy siesaipa châ ta, hla achuna liata a hmâh khaipa a châ. Chavâta hlapy phapa padua awpa ta cha a mâ hluhpi a byuh” tahpa ta a reih. Â do ngâsâpa ta ei pahno.
Krista chakaotuhpa maihta pahno awpa.
Keimo apasapata Abeidyuchhai liata eima tyu nota Zisu Krista cha eima phei ryta eima patyusa no a châ tyh. Keimo alei su nawpa liata eima tyu nota Krista cha rôhnahpata abeidyuchhai liata eima patyusa no a châ, tahpa he Krista chakaotuhpa nata azituhpa maihta abie cha pahnona dei châ leipata hro nata nôchâ liata palâsa khai theipa châ mawsala Krista khinarâh cha kaw aw ta angia ngâsâ aw.
Atahma Bible bie khochhih ngâsâpa eima nahthli heih tua aw.
Hrohsopa Isai hnohta Abeipa bie avaw tlô. He hawhna heta: Abeipa Khazohpa Thlahpa cha ei chôta y ta, ano chata pathipalôh keichheipazy patlâh awpata zy, seizy hnohta puana kyh nata chahrypa ta a ypazy hnohta atâhna o pahyna kyh rei awpazy” tahpa ta Abeipa bie avaw tlô. (Isai 61:1).
Sei atâhpenawhzy puana kyh thâtih he hlapy to zydua ta Pawla nata Sila hawhta thlahpa nata hmeiseihpa ta hla sa theipa châ mawh sala, Jubilee dawh pyungia ngâsâpa chata khizaw râh to liata pathâh lymâ aw ta, Krista kyhpachâna rohpahâhpa chata khizaw chhiesana râh cha vâpawpi pawna râh, alyna chhâ leina su nata râh lâta avaw châ khai ha aw. Abeipa Khazohpa cha chhâzaw ta reithaipa ta y mawh sy. Amen.
Khazohpa cha hmoto ataotuhpa a châ.
A hmotaopa hry liata peimawhpa sâkha cha meihdo he a châ. Biehrai Parohpa (OT) lia nata Biehrai Thiehpa (NT) lia chhaota Khazohpa ta a chhaichhi ta avaw hmâ lymâpa a châ tyh.
Meihdo he chi thôh y ta, A saihpazy, arâhpazy, avyhpazy ta ama y. A khoh khiahta cha nâma nata keima chhao he meihdo lâta maniah a pachâsa thei. Ato ataotheituhpa ta ano lyupa ta chyhsapa ta maniah a taopa vâta ano lâta alynabie a reih ngâthlâh ha awpa eima châ, tahpa a my kha ei suh vy.
Khazohpa hmotaopa hry liata no-âhchhihpazy.
Hluhpi y ta, reitiah’pa châ leipa ei ta, a chyhta dei ei vaw palâsa aw:-
Uliahzy, rainôzy he ama pôhpa chyhta hra ei sala ama ao pha ngâsa ta, ama daihti liata ama sâ na ta cha chyhsa palôh a paliesa ngâsâ ei. Khazohpa ryraona no-âhchhihzie ama ao reikah ta ama palâsapa a châ. Chavâta hla aphituhpa heta thlahpa mokhaoh tawhta avaw hmôpasia kawpa a châ. He hawhna heta:
          Lei chô liata hmo hroh zydua,
          Husona ahneipa maih;
          Beipa cha palyupalih ei ta,
          Hy Bei rônah tahta sa ei,
avaw tahpa a châ. Chyhsapa deita he Ano lyupa ta a taopa châ pi ta, Ano palyupalih awpa kyh liata deikua cha hmohrohneipa zydua ta Khazohpa ama rei sai ta ama palyupalihpa sai ama cha.
Mizoram Baptist Palai (vyuhtuapa) ta ei sie nota Rev.Thanzinga nata hmaohkha ta siekhoh pi ta, Typi khih khô liata mel tô cha anubyzy parao khai ha ei ta, cha liata Rev.Thanzinga (L) cha mel tô cha buakha a duapâh ta, “Chyhsazy eima moleizie rima cha aw! a pei ngâsana” tah ta, Rev. Thanzinga hrozie nata nôchâ ei hmô na ta achupa hluhpi ei na pahneisapa ta ei pahno.

Chyhsapa he khizaw rie a patheituhpa eima châ.
Bible bie eima nahthlie tua aw, “Hmotaopa zydua chata hnabeiseih ngaitapa ta Khazohpa sawzy avaw luahna cha a ngiatiah leipa ta y chhei ha tlô ei ta” tahpa ta Bible ta miah a chho (Rawma 8:19) mo teh. Khazohpa ta a khoh ngâsâpa ta ataopazy he eima za awpa a châ, eima parao awpa châ vei.
Khazohpa hmotaopa hry liata
A zo lâta nie atluapazy y ei ta, nochhôh lâta nie atluapazy y heih ei ta. Abeipa Khazohpa ryraonazy he no-âh a chhih ngâsapa sai a châ. Reitiah awpa châ vei. Veihtu thâtih dei ei vaw palâ tua aw - pahno chyupa hawhta veihtu he a ao paro ngâsâpa ta Khazohpa ta a taopa ama châ. Ama reih aparozie cha tupi râhmâhpa thokôpa tawhta ama nôvah baokha ta hla ama sa tlyma, bie ama reih tlyma, ama ao pyu cha paro ngâsâ ta; chavâta â hlapa pi tawhzy ta thei thlâh hapa a châ.
Chavâta hlaphituhpazy chata angiapâna tawhta avaw hmôpasia ngâsâ. He hawhna heta:
1.   Hy Bei Khazoh, na hmotaopa zydua he,
Pachâ châhta no-âhna ta na bie;
Zâ awhsi khaihpa tôkôlôpa pyu,
Na hmotaothei vâh alâpazy.

2.   Tu thosôh râhmahzy chahryh châhta,
Thosôh chô lia sopavaw hla sa ei;
Sai ei sih la, tlâh to nah su to tawhta,
Thlihua vaw sie, chavah nai zualuah loh, a vaw tahpa a châ, a rônah hmeiseih.
Khazohpa he a hmotaopa zydua tawh sai hmahta, zo tlâh nata angiapâ tlâh a châpa a châ.
Atlâhpakyuna

Beihvituhpa pakhona bie peimawhpa tahpa biepipa hmâpa ta sermon ei ropa he, ei ropa hlâta a pha via syulyupa ta areihtuhpa zydua chô liata Abeipa ta byhnâ pie mawh sy. Amen.

Comments

Popular posts from this blog

ABeipa châta chyhsa rônahpazy thâtih

Rev. C. Thalai

Spurgeon zy, D.L. Moody zy, Billy Graham zy he ama hawsaih no tawhta ama nô nawhzy ta Khazohpa bie, thlahpa lâ sâhpiti ama vaw mohôhpa nata palaiseihsapazy ama châ. Chavâta Khazohpa bie cha ama thlahpa pati châta ama vaw nie hawpa a châ. Atahmâ Bible bie tawhta eima nahthlie tua aw. “Hawsaih a pih thiehpazy hawhta Thlahpa lâ sâhpiti, khâpa hmah ahlao leipa cha vâ teh u, chaliana chata pachhana tlohna taihta nama laiseih thei n’awpa ta” ( 1 Pity 2:2) he bie he ama thisaih liata ama vaw laiseihkhei hawpa a châ             D.L. Moody cha my chareih ta dawh 4 ta thyu ta, dawh 1 chhôh Bible rei n’awpa ta a daihti a hmâh tua chai tyh tahpa a châ. Spurgeon cha Bible ei 100 a reih papuapa châ ta, ei zakha a reih papuapa cha, “A thiehpa hawh sai ta ei nie tyh” tahpa ta a reih. Richard Wurmbrand ta he hawhta bie rônah ngaitapa a reih hra. “Krizyhpa châ na ta, chakaotuhpa chhao châ na ta atah tlôh ta, rietheina, rairuna atyh beih leipa chyhsa cha chyhsa vâdua chaipa nata ngiachhi a…

Apalaina

A PALAINA (VYUHTUAPA) HNEI TUANA -Rev. C.Thalai Kô 1949 January Iana Pakhypi hnôhchaipa tawhta Presbytery hneipa châ sala, tahpa châ ta; Presbytery hnei n’awpa chhao cha ‘Saikao Headquarters liata châ mawh sy’ tahpa a châ. Adaihti March 15, 1949 a châ. Chairman hmiatua chaipa he Machâ Khikô (Sawlawmaw paw) a châ. Ryurei chhôh zydua cha, â dua sai  ta â duahpa ta ryureina a chhihtha. Baptist Awnanopa tawhta Vyuhtuapa (Palai) a khy penawh cha Rev. Challiana Murray nata Lyuchâpa (Tirhkoh) Khuma zy ama châ. Rev. Challiana ta ryureina nata phôh zydua maniah chho ta, a biereipa khaihna tawhta hmahsiena thata maniah a piepa ta pahnopa a châ. Moh yzie  Presbytery tahpa he Baptist-nah chhaota kô reipi ama vaw tahpa a châ hra. Kô 1959 Lunglawn Presbytery keima Palai ta ei sie kô tawhta Assembly tah awpa tahpa a châ. Kô 1960 tawhta cha Assembly tahpa a châ. ECM chhaota Kiasie Assembly 1961 tawhta Assembly tahpa a châ hra. He kô liata Chairman cha T.Bilhranga a châ. Baptist tawhta Palai â khypa Rev.D…

Varah cha rietheipazy rah a cha

VARÂH CHA RIETHEIPAZY RÂH A CHÂ Rev. C.Thalai
“Unawh kho ngaitapa saih u, pachâ teh u, rietheipazy he angiapâna liata a rôhnah awpanata ano kyhpachâtuhpazy hnohta a taihpa râh a totuh awpazy ta rao vei ma?” (Zami 2:5). Abeipa ta ano moh vâta riethei a taotuhpazy nata rairuna a tyhpazy châta “ryu to a rao thei leipa, apuapa a hlao leipa, alo thei leipa, avâ liata nama châta a khaipa cha hmô awpa ta” tahpa ta Bible ta maniah a chho (I Pity 1:4). Atahmâ Bible ao khochhih ngaitapa tawhta eima nahthlie heih tua aw. “Hezy he riethei pasana tawhta a puapa sahlaozy kha ama châ; ama pohzy Mietahkupa Taw thisaih ta pasupa ta ama pangyuhsa haw” tahpa ta machâ hryta pakha ta a vaw chhopasia haw (Biph.7:13-14). Abeipa Zisu chhaota, “Ahyrai na zi awpa a khoh khiahta cha riethei tao papeisa leipa ta nohto kraws a pupa ta na zi mawh sy” a tahpa a châ. Lyuhchâpa Pawla cha Abeipa moh vâta rietheina nata taolana a tyh hluh kawpa a châ. He hawna heta- “Ei hluhpi ama chhei khai tawhta patahna o liata khô ei ta…