Skip to main content

BEIPIPA - KRIZYHPA CHHÔHKHA PHAPA PADUA THEI NAWPA TA MOTHLIH A NGIA

 (Hlazy 126:5,6) Rev. C. Thalai

Mothlih tlana chôta a tupazy chata thapha ngaitapa ta ama hria aw! Chana chôta sâ chi pua khei hra sa la, a sapiazy cheipa ta thapha ngaitapa ta a vaw di heih awh.” He bie reikah he kho a chhi kawpa nata a ngia ngâsâpa, thapaw a chhi kawpa a châ. Izarel sawzy ta cha ‘chakhâ kiana hla’ ama tahpa a châ.

MOTHLIH Y ZIE :
          Chana nata mothlih he yzie a hnei pathu ngâsâpa a châ. Y zie hnei leipa ta mothlih he tla chakhyh vei, chyhsa mo maniahpazy thi nota mothlih tla thei vei, viasa kyhpachâpa nata sanaw-chhôhkha a zaopazy thina ta deikua cha pachu byuh leipa ta mothlih cha ti hawhta a kawpali thlah ha tyhpa a châ.
          Atahmâ cha Nehemia thâtih tawhta eimâ chu tua aw. Nehemia he chi nata pho thapasana a hneipa chyhsa châ ta, Zudia râh tawhta a vypazy tawhna chata ama thâtih hiahri ta; ama tovyuh chhiezie zy, Zerusalem ku a chona kyhzy, o chhi meita a kâ na thâtihzy a thei nata a tuh ta châ ta, nohkhazie tlyma pachârôhpa nata nie leipa ta y ta, Abeipa Khazohpa lâta thlah a chhâ tahpa eima pahno (Nehemia 1:2-4). A chi nata pho kyhpachâ ta a thlahchhâna cha a hlaotloh ngâsâ. He daihti liata Abeipa Artezerzia hmiakô liata a luah awpa cha a lyna hmiaphaona chôta luah awpa a châ. Pachârôhna hmia phaona chôta amâ luah khaihta cha ama rai taihta pabâ theipa a châ hleikhoô ta ama hrona taih chho tlai pahlei theipa ama châ. Chatluta Persia dâh nata biepipa â ipa a châna chôta Nehemia deikua cha a unawh chi nata pho kyhpachâna vâta pachârôhna hmia phaopa ta Abeipa hmiakô liata â luah a châ. A rai bâ awpa nata a hrona pahlei awpa cha rei leipa ta Zerusalem taopathi nawpa ta a hiapa a châ. A thlahchhâna Abeipa ta a chyh-eihpa vâta pheisai hlaokha a vaihtuhpa awpa ta abei Artezerzia ta a pie tahpa eima pahno. Zerusalem ku dôhna a rao khai hapa cha Nehemia mothlih vâta hâta eithô (3) chhôhta taopathipa a châ haw! Chahawhna hrana chata nâma nata keima chhao chhôhkha cha raokhei khai hrasala  mothlih chhao ta Abeipa eima awsao khaihta cha, “Zerusalem cha thaphana ta taona ta, a chyhsazy cha a lyna ta ei tao hi.” A tahpa hawhta eima chhôhkha cha Abeipa ta maniah a taopathiheih aw (Isai 65:18,19).
          Atahmâ Juda Beipa Hezekia thâtih eimâ chu heih tua aw. Hezekia cha thi daihmâpa ta pasa ta, chanona chata Hrohsopa Isai cha a hnohta a vy ta, Abeipa chata he tana heta a tah. “Na chhôhkhazy khihsana zie awpa paryh teh, thi tlô aw chi ta, hroh aw va chi. Abeipa ta a tah.” tahpa vaw chho ta, chatawhcha Hezekia cha pâhchhô lâ a heihpa ta a palie ta Abeipa lâta thlahchhâ ta, thata cha ta. Abeipa ta molei ropa ta a chana ao cha thei ta, Isai tuah heih ta kô 15 chhôhkha paryh awpa ta a hrona kô a baichhapa tahpa Isai 38:1-6 liata eima hmô.
          Unawh kho ngaitapa y, nâma nata keima heta chhôhkha paryh nawpa ta daihti khachâ ma eima hnei a pahno tlôh leipa pi ta, chavâta, chhôhkha a kina daihti sôhpa nata phapa maniah a khôsai hlâna heta chhâhkha maihsa padua khai ta, eima chhôhkha liata Zisu Krista cha Abei chaipa ta rao khai bâ ei suh u (I Pity 3:15)
          Atahmâ hrohsopa Zeremia thâtih tawhta eimâ chu hei tua aw. Zeremia cha a hrochhôh ta a lyna rai a hnei leipa Hrohsopa ngiachhie a chhihpa ama tahpa a châ. Hrohsopa Zeremiah mothlih a hluhna chhâpa cha Izarel sawzy ta Khazohpa hrohpa siesai ei ta, nohthlapa ama chhypa vâta ama satlia phapa nata laihsa phapazy cha Babylaw sei châna liata ama tah khaipa vâta Zeremia mia cha a mothlih hi leipa ta tihnawh hawhta a lo ngâthlâhpa a châ. (Châphôtuna 1:16). Chavâta, a châbu moh chho “Chaphôtuna hla’ tahpa a châ. Mothlih nata chahna ao pyu cha Abeipa Khazohpa ta a pasô kawpa a châ. Chavâta, Hlazy a rohtuhpa chhao ta he hawhta maniah a chho. Abeipa ta ei chahna mothlihzy he na chhihrô-ô liata ryh ma y, na châbu liata ropa châ vei ma? Mothlih he hmo sôhpa a châzie Abei Davi hro liata pahno theipa a châ. (Hlazy 65:8). Khazohpa bie papeimawhsa leipa cha chhiesapa ta y mawh sy tahpa (Zeremia 11:1-3) liata eima hmôpa hawhta Israel sawzy ta a bie ama zyh leipa vâta Babylaw sei liata ama tâh khaipa a châ.
          Atahmâ keimo chhao he Khazohpa bie eima zyh leipa vâta moleina a poh lymâ ta, kha hlâno ta eima hmô beih leipa nata eima thei beih leipa moleina Iahzai (Ngawlveina) Drugs nata paritheipa nanopazy ta eima sawnazy thata pahlei-padia ta, thyutlia sâh hluhpi thina thlâ khaoh lâ amâ ngia hai!!! He khizaw liata vaw kua heih khao aw vei ei. Abeipa Ngôsapiazycha a lo ngâ hai, he he pahno ta, “Noh hnôlâzy liana chata daihti ru ngaitapazy a vaw y aw.” (II Timothy 3:1-5) liata ropa bie cha atahmâ a vaw tlô ngâ hai. Atahmâ cha sôh palie nawpa ta chyhsa hrona sôh ngâsâpa chhao pahlei awpa ta pei tahna y khao leipa ta châmaihzy taihta sôh palie nawpa ta ama hmâ ha bâpa a châ hawpa a châ.
          Sahma nata paritheipa Drugs zy vâta nôpaw hluhpi cha pachârôhpa ta a rôh ngâpa sai eima châ ha bâpa a châ! He zydua a vaw yna a thabypa cha ‘Chhôhkha Maihsâh” a y leipa/eima padua leipa vâta a châ. Thyutlia hluhpi  châ ta, daihti khô ha hrasala saw nata samohzy châ ta chhôhkha liata thâtihpha chho awpa nata thlahchhâ awpa ta thapi eima phia via awpa a peimawh. “Thokha taozie hawhta eima pakhyna zy bâhsai leipa ta tlao a pasyu rairie ei suh u. Noh a vaw hnia via rlipa ta nama pahno nata thata a pasyu pachai ei suh u.” (Hebrai 10:25).
          Maisâh cha Khazohpa nata a chyhsazy bie a chhona suh a châ. Abeipa Khazohpa ta, “Su pathaihpa na taopa ei se, ama hry liata ei pahrâ thei anwpa ta,” (Puasaina 25:8). “Nama hry liata ei a chhyna byureih cha pa y sa aw na, ei hrona chata châ heihsai aw vei ei. Nama hry liata y aw nata, nama Khazohpa châ aw nata, nâmo chhao ei chyhsa nama châ aw.” (Theihthaina 26:11,12) Maisâh cha Abeipa Khazohpa nata a kao khohna su a châ.
          A kaona peimawhzie cha chyhsapa lia chhao hmahta o-zy kiah-choh thainapa maih cha kyhpachâna nata a zao khina hnei via tyhpa a châ. Chyhsapa hmahta cha hawhta a châ khaih nohto ta chhôhkha maisâh hneita Khazohpa nata a kaolâhpa a phazie cha Abeipa Zisu hmia anano nota Mawsi nata Elaiza ama zâ luah nota Abeipa Zisu hmia cha noh hawhta khaihta a chysiazy cha ngyureih ta thlarawsiepa ta a vaw y nona khata Pity cha o lâ a dipa maisâh hnei ta chhôhkha a pakhyna a hnei tyh penawh alyna cha a lei lynâ châ leipa ta, a vâ lynâ ta ama bie tyhpa a châ. Hla a taotuhpa chhao ta, “Nâ na y khaih lei vâ a châ hra.”  A vaw tahpa a châ. Abeipa nata akaolâh na chhôhkha maisâh mei cha a ia ngâthlâh ha awpa a châ, a thi awpa châ v4i. Khazohpa nata a kao khohna a châpa vâta chhôhkha maisâh hneipa maihta rao/chhie hmeiseih beih aw vei ei, Abeipa Khazohpa nata ama zao hapa vâta.
CHAHNA AO PYU :
          Babylaw chahva kiah liatazy a ptuh ei ta, chah tyh ei ta, ama chahna ao nata ama rôhna; chahna ao Abeipa Khazohpa ta pahno ta, ABeipa tawhta vaw tlô ta Zerusale chahna nata arôhna khohpi cha layna khihpi lâta avaw lie aw tahpa ta Isai ta tlâh a vaw awh chhieliepa a châ. (Isai 65:19)
          “Zerusale chô liana chata thaphapa ta y aw na ta, ei chyhsazy chô liana cha ta chahna pyu cha theipa ta chakhao liepa aw ta, sâ ngana pyu chhao theipa châ khao hra aw vei,: (Isai 65:19) He bie aly a chhih ngâsâpa tawhna heta Zerusale chahna nata a rohna khihpi cha alyna lâta a vaw châ haw.
          Cha hawhna hra chata keimo chhao chhâhkha raokei khai hra ei si la, molei ropa ta mothlih chhaota Abeipa eima awsao hra khiah cha eima o chhôh cha Paradis su phapa nata su ngiaryh a chhipa su khochhihpa o chhôh a vaw châ ha aw!
CHAHNA NATA MOTHLIH HMOTAO THEI ZIE.
          Hrohsopa nata mopathaihpazy chahna nata mothlih hmotaotheizie hawhta rei ei si la, a vâ tawhta tôkalôhpa a zathua ta; a lei ry taihta a zâ chalyu khai ha hawhna heta molei rona angaipachhina mothlih cha vâ salem khihpi a kaw chalyu hra aw tahpa pangiasa a chhih.
          A reituhpa khoh ngaitpa y, o chhôh liata rairuna chi nanopa y tyhpa he a reisina nata molei reihpha a chei na chô ta, Abeipa na aw sao khaih cha na chhôhkha rao khao aw vei. Sawchapaw a leipa chha kha a sôh cha hrao leipa liata a hmâh khai tawhta chakâhna vaw tlô ta, niepa a hnei khao lei tawhta, ‘thyu aw nata ei paw o lâ sie aw nata’ tahpa ta a reisi ngâsâpa ta, molei ropa ta, molei reihpha cheipa ta, ‘ei paw y, a vâ liatapa chô nata nâma mohmô liata hmo ei parao na, na sawchapawpa ta bie tlâh châ khao vana,’ tahpa a reisina ao pyu he Khazohpa palôhrupa liata rohpahâhpa ngô hlâta a sôh viapa a châ.
          Sawchapaw leidiapa thâtih cha he hla heta a chho pasia kawpa ta ei pahno.
                   Ei thyu awna ei paw olâ ei sie awna,
                   Ei hmiakô lia meihdo hawh zoh;
                   Na ngiachhietuh hropa khizaw lia hmô vana,
                   Ei paw leita ei leidia aw.
                  
                             Molei paviasai hr’awsa,
                             A phana tleih bei vei;
                             Ngaipachhi ta ei tlua khiah,
                             A zawh ei zi heih aw.
         



          Hla a phituhpazy he Thlahpa hmo piepa rôhna ngâsâpa pavaosapazy ama châ. Atahmâ daihti he moleina thlihpi ru ngâsâpa ta chhôhto maniah a su ngâ hai. Chavâta chhôh to liata moleina meihdo a pai thei kaho vei. He hla he eima biepipa a baotuhpa châ ta, eima pazao heih aw.

                   He lei hela molei reipasaona bâh aw vei,
                   Nohto reipasao ta ei y;
                   Mo ta ei hmô nah ta ei theipazy,
                   Molei lâ na chhi.
                            
                             Châhrasala Beipa kyhpachâna rôhna,
                             Molei ro a ngiathai;
                             Molei ropa ta ei vy, Beipa (2)
                             Ei molei ngaithai la.

          Tahpa ta Abeipa lâta a ngaithaina hla chyu suh vy.

MOTHLIH PEIMAWHNA ZIE:

          Lyuchâ Pawla cha Awnanopazy kyh a pachâpa vâta mothih hluhpi a pathla tahpa eima pahno. Ephisi Awnanopa a puasai awpa chy liata he hawhta a reih. “Chavâta a hrohrua teh u, kô tho tlai mothlih tlana chôta a chhô a zâ ta chyhsa to chhoreipa ta ei bâh leipa kha a thei thlah ha teh u,” tahpa ta bie ta ei. Pawla cha Awnanopazy kyh a pachâtuhpa vâta kô thô chhôh zydua mothlih tlana chôta thâtihpha tlâh a awkheipa a châ. (Hmotaopazy 20:31). Pawla cha Awnanopazy kyh a pachâpa vâta mothlih tlahna zie he hawhta a reih, “Mothlih hluhpi tlahna chôta pathipalôh rietheipa nata thlahzo ngaitapa ta ei ropa a châ.” (II Kawr 2:4) Pawla mothlih tlana cha y zie  ahnei ngâsâpa a châ tyh. “Chyhsa hluhpi sie ei ta, cha chyhsazy cha Krista Kraws khakhaipa ama châpa ama thâtih kha ei cha chhopa ei kha, atahmâ chhao chana chôta ei cha chho ei hih.” (Phil 3:8) Pawla cha Awnanopazy  châta a mothlih hluhpi  a hryupa vâta Awnano penawhzy chhao chata pasô ngâsâ hra ei ta, chavâta Pawla ta he hawhta bietana a hnei ei. “Abeipa Zisu bie pahno thlâh hana chôta a chieleipazy nama bao awpa a châ. Abeipa Zisu tlai ta, ‘Khapa leipa lapa hlâta piepa ta byhnâ a to via’ a tahpa bie a rei khai nata ama zydua ta cha ei ta, Pawla cha a py ei ta, sy ei ta, baly pahâna su taihta ama pathlie haw tahpa Bible liata maniah  a chho. (Hmt. 20:31-38). Chana nata mothlih he kyhpachâna theilâpa roh thlôh ngâsâpa a châ.

KRIZYHPA CHHÔHKHA  PHAPA PADUA THEI NAWPA TA CHA MOTHLIH A NGIA.

          “Mothlih tlahna chôta atuhpazy chata thapha ngaitapa ta ama hria aw. Chahna chôta sâ chi puakhei hrasala a sapiazy cheipa ta thapha ngaitapa ta a vaw di heih aw.” (Hlazy 126: 5,6). He bie he Bible reihka khochhi ngâsâpa nata a ngia ngâsâpa, thapaw a chhi ngâsâpa Izarel sawzy ta, ‘Chakhâ kiana hla’ ama tahpa a châ. Rietheina kho liata alyna a y.


“Chhôhkha taopathi nawpa ta mothlih a ngia’ tahpa biepipa hmâpa ta Sermon ei ropa he chhôhkha a raokei khaipazy taopathi nawpa ta Abeipa ta byhna pie mawh sy. Amen.

Comments

Popular posts from this blog

ABeipa châta chyhsa rônahpazy thâtih

Rev. C. Thalai

Spurgeon zy, D.L. Moody zy, Billy Graham zy he ama hawsaih no tawhta ama nô nawhzy ta Khazohpa bie, thlahpa lâ sâhpiti ama vaw mohôhpa nata palaiseihsapazy ama châ. Chavâta Khazohpa bie cha ama thlahpa pati châta ama vaw nie hawpa a châ. Atahmâ Bible bie tawhta eima nahthlie tua aw. “Hawsaih a pih thiehpazy hawhta Thlahpa lâ sâhpiti, khâpa hmah ahlao leipa cha vâ teh u, chaliana chata pachhana tlohna taihta nama laiseih thei n’awpa ta” ( 1 Pity 2:2) he bie he ama thisaih liata ama vaw laiseihkhei hawpa a châ             D.L. Moody cha my chareih ta dawh 4 ta thyu ta, dawh 1 chhôh Bible rei n’awpa ta a daihti a hmâh tua chai tyh tahpa a châ. Spurgeon cha Bible ei 100 a reih papuapa châ ta, ei zakha a reih papuapa cha, “A thiehpa hawh sai ta ei nie tyh” tahpa ta a reih. Richard Wurmbrand ta he hawhta bie rônah ngaitapa a reih hra. “Krizyhpa châ na ta, chakaotuhpa chhao châ na ta atah tlôh ta, rietheina, rairuna atyh beih leipa chyhsa cha chyhsa vâdua chaipa nata ngiachhi a…

Varah cha rietheipazy rah a cha

VARÂH CHA RIETHEIPAZY RÂH A CHÂ Rev. C.Thalai
“Unawh kho ngaitapa saih u, pachâ teh u, rietheipazy he angiapâna liata a rôhnah awpanata ano kyhpachâtuhpazy hnohta a taihpa râh a totuh awpazy ta rao vei ma?” (Zami 2:5). Abeipa ta ano moh vâta riethei a taotuhpazy nata rairuna a tyhpazy châta “ryu to a rao thei leipa, apuapa a hlao leipa, alo thei leipa, avâ liata nama châta a khaipa cha hmô awpa ta” tahpa ta Bible ta maniah a chho (I Pity 1:4). Atahmâ Bible ao khochhih ngaitapa tawhta eima nahthlie heih tua aw. “Hezy he riethei pasana tawhta a puapa sahlaozy kha ama châ; ama pohzy Mietahkupa Taw thisaih ta pasupa ta ama pangyuhsa haw” tahpa ta machâ hryta pakha ta a vaw chhopasia haw (Biph.7:13-14). Abeipa Zisu chhaota, “Ahyrai na zi awpa a khoh khiahta cha riethei tao papeisa leipa ta nohto kraws a pupa ta na zi mawh sy” a tahpa a châ. Lyuhchâpa Pawla cha Abeipa moh vâta rietheina nata taolana a tyh hluh kawpa a châ. He hawna heta- “Ei hluhpi ama chhei khai tawhta patahna o liata khô ei ta…

CEM Bungalow 262 Lakhs ta sapa cha Puhpa Lalsawta ta apahy

Siaha, August 15, 2017:  Atanoh Tuesday August 15th 2017 pata Mizoram Finance Minister Puhpa Lalsawta ta Mara Autonomous District Council (MADC) CEM Bungalow Siaha liata Rs.262 lakhs ta sapa cha atamy mydi daw 7:00Am pata apahy. He pahyna programme lia heta Puhpa Lasawta ta bie a reih pa cha atanoh he su liata avy penaw zydua pi he a thi awpa sai cha pita, anodei kua khati ma eima thi aw tapa ahy tahma ta pahno tla leipa pita, eima thi hla ta ngachhi kawpa nata tiama kawpa ta rai hria chyu su vy tapa ta pasyuna bie a reih.