Tuipang News
Wednesday, June 18, 2008 1:1 AM. Posted by burgerstud2005 (133 views)1. Green Mizoram Day Tuipangah Hmang Dawn
Green Mizoram Day chu Tuipang ah ni 18 June 2008 hian hman tum a ni. Tuipanga Green Mizoram Day hman tlai anihna chhan hi official te Tuipangah an awm kim loh vang te leh official thil a an zin bo vang te in a hun takah neih a ni thei lo a ni. He Geen Mizoram Day hi Tuipang Sub-Headquarters, MADC a Forest Deptt chuan a huai hawt dawn a. Ni 18 June 2008 zing dar 10:00 ah Tuipang Bus Station ah in nghak khawmin a hu ho in Tuisih Kawn (Ramhuai Liam Kawn) an tih ah chuan thing phun hna tlang leh a hma a phun tawh sa tih fai leh sam fai hnatlang an thawk dawn a ni.
Ni 18 June 2008 a thingphun hnatlangah hian sawrkar official zawng zaqwng bak ah school zirtirtu leh school naupang te, NGO member hrang hrang te an phur hle a ni.
2. Tuipang Tlangval Kaphlum
Ni 16 June 2008 zan khan Tv. Robinsona, Pu KL Chhinga, Tuipang Dairy Venga khawsa chu Diphu ah kah hlum a ni. Tv. Robinsona hi a thian te nen khawlai ah lengin an in ti hlim a, heti lai hian misual ten an rawn kap hlum ta ni tiin an sawi. Amah hi Assam Regiment tanglai niin, Manipur ah a awm mek a. Diphu ah hian training rei lo te neiin an cham mek lai a ni. A ruang hi naktuk tuk leh ni 19 June 2008 ah Tuipang a lo thleng ang.
3. Tuipangah Job Card hna ni 14 thawk leh tan dawn
Tuipang RD Block ah NREGS hnuaia hna chu chhungkaw 4174 tan ni 14 Work Order a chhuak leh ta. Tuipang RD Block ah hian NREGS atangin tui kawng laih te, terrace laih te bakah Playground leh in kal pawhna kawng internal road te laih a lo ni tawh thin a. Tun tum hna chhuak ah pawh hian kawngpui laih te, terrace leh tui kawng laih te an thawk ang.
NREGS hnuaiah hian Chapui khua in an khua leh Sabawng kalna tur Jeep Road an laih chu a tha hle a. Hei hi PWD chuan lai ta se chu cheng nuai 500 vel an seng ang. He kawng hi thal lai chuan duh tawkin pick-up pawh Chapui leh Sabawng (Burma) in kar a tlan thin.
4. Tuipangah SDO (Civil) Office leh Tourist Lodge sa dawn
Sawrkar in hun rei tawh tak Civil sub Division thut hmun a a siam hnu ah pawh SDO Civil Office a la awm cheu thin a. Tunah hian RD Deptt atangin BADP scheme hnuaiah SDO Civil Office chu sak theihin a awm ta. A hna pawh hi June thla chhunga tan theih a ni ang. A hmun tur atan hian MADC/khawtlang/VC ten hmun tha tak an pe tawh bawk. SDO (civil) sak tur hi Rs.12.00 lakhs man a sak tur a ni.
Heti lai hian Tourist Lodge pawh sak tura peih a ni tawh a. Pawisa pawh a thleng vek tawh bawk. Mahse Tuipang D leh Tuipang V te a hmun turah an in chuh vangin hna an la thawk thei lo. Tuipang D lamin sipai ram ah sak tir an lo tum ngawt a, mahse a lo theih hauh si loh avangin Tuipang V lamin vengthlang lamah i sa mai ang u an ti a, mahse Tuipang D lamin an veng ni lo a Tourist Lodge sak a ni tur kha an ui avangin thu mumal a la awm thei lo.
SDO Civil Office pawh hi Tuipang D VC leh mipuite chuan tuna RD Deptt ram BDO Office awmna velah sak an duh a, mahse tuna Tuipang BDO hian RD Deptt ram sah thlak a rem loh thu leh hmun awl awmsa a sak a that thu a sawi avangin huai takin Tuipang D lungawi lo chung chung vengthlang lamah a sak tir ta a ni.
News Courtesy: Burgerstud2005 (Lalengmawia Vantawl, Marasaw.com News Contributor from Tipa)
