Lorrain Vision
Wednesday, September 19, 2007 10:48 am posted by Admin (213 views)- Rev. Zodau
A. Biehmiapa
Marara Kawspel Setenari daihti he Marasawzy châta eima misawnarizy thatih reina daihti eih-hrâhpa sakha a châ. Misawnarizy hriapasana theilâpazy eima chana hawhta eima râh nata chipho nata Awnanopa châta Khazohpa tawhta eima misawnari aluahna (vision) he pahno byuh a chhi kawpa sakha a châ hra. Lorrain Vision thabypa cha Marapa misawnari châta K’zohpata a awna he a cha. Misawnari awna vana heta Marapa cha Ano ma pahno hla chhao ta, K’zohpa ta kyh maniah pacha ta maniah a tlyh haw (Zhn. 15:16)tahna a palâsa. Paw K’zohpata khizaw kyh a pachâna cha Zisu Krista liata a palâsapa hawhta, Marapa chô liata a kyhpachâna cha Misawnari hnôhta bie paru a chhopa he a cha. Lorrain palôhru liata awna ao a thei tuachaipa cha “India râh-chaki (further India) la sie teh” tahpa ao thei ta, K’zohpa awna ao a cha ma(?) tahpa pasia ta K’zohpa tawhta achhyna bie cha Luka 10:17-20 he a cha. Cha hleikhôpa ta Lorrain Vision he a hlaphipa ECM Kzy Hlabu 489 liata chhao pahno thei via heihpa a cha. Chavata Lorrain Vision tahpa he “K’zohpata Marapa kyh maniah pachâna ao” a chapa vata Setenari daihti liata K’zohpata Marapa maniah a pathao khei laihna zy pachâpazi awpa he noai a chhih leipa a cha.
B. Misawnari Awna
R.A Lorrain he pho zachhihpa nata pho a sâhpa chhôkha tawhtapa chata, satlia chhithai kawpa, riahphapa kawpa a cha. Kôzabi 19-na Mongyuh râh ahrana liata theilâ pakha a cha. Ano he a pipathi tawhta misawnari a pie awpata palôhru khâchâ a laipa cha ta, chahrasala tovyuh vaw hmô thei tyh vei. Cha daihti liata a utapa Lôlei liata misawnari a chakao haipa J.H.Lorrain tawhta châ paphaopa a dao. Cha liata Lakher chipho Lushai Hill chhâna lâ liata ama y tahpa Marapa thatih a vaw chu tua chai. K’zohpata a theipa cha thatih cha hmâpata Marapa misawnari châ awpata a aw pathaopa a cha. Cha awna cha Biehrai tawhta pa-ipa a vaw cha. Biehrai bie tawhta K’zohpa awna a pahnona nata a aw chhâna â pahnona zy cha:
Luka 10:17-20
1.v.17 tuapa sysari nata pano hry liata pakha hawhta â pahno aw.
2.v.19 Tuapa pakha a cha hrapa va ta parihzy, râhcha-iazy (khakhaipa, ahripa) pahnie theina hmotaotheina ei hnei haw tahpa thlalôh ta riahphana a hnei aw.
3.v.20 Abeipa ta a tua chhânapazy:
a. Marapa râh tlâh liata ahri raihria adyuh awpa
b. Marasawzy vârâh liata moh ro khai awpa(Marasawzy Kri pazysa awpa)
Awna â pahno tawhta thlai hmah a la tuachaipa cha Misawnari raihriana chhaichhi a châpa “Lakher Pioneer Mission” February 11, 1905 liata padua ta, a Motto cha: Ngiapana ta hriapapua, thlachhana liata padua ( Launch by Faith, Founded in Prayer) a cha. LPM ta a chheipâh mission society hropazy nata â nanona cha “Chipho nata râh anuapa K’zohpa khihnarâh chakaona” he a châ. Marahpa râh liata ahri raihria adyuhna abaotuh awpata David Livingstone Medical achuna liata thohna kôkha achuna a hnei. R.A.Lorrain nata a lapinô Moud Louise Lorrain cha January 18, 1907 liata ama pahrâna London khihpi vaw pua sai eita, runahna hluhpi siepahliepata September 26, 1907 ama nuapa Marapa râh Saikao khih ama vaw tlô.
C. Lorrain Vision liata Mara Râh
K’zohpata Lorrain a awna daihti liata a sie nawpa su Mara râh chhao â tlypâ hawpa a cha. London khihpi tawhta pahnona rakha liata cha India râh-chaki liata a ypa hawhta vaw pahnopa a cha. Marara cha Myanmar, Bangladesh nata India a tyhpakhyna liata Mara reih a cheihpazy pahrâna su a cha (Mara Biehrai nata Hlabu ahly theipa zydua he Mara reih a cheihpa tahna a cha). Lorrain ta cha Marara he “Pahno-patheibeihleipa râhpathohpa” (Unknown Jungle) tahpata rei ta ano he Marara liata thatipha a vaw tlô khei tuachaipa a cha.Marapa râh cha LPM field ta a pahawhpa a cha. Lorrain hladaoh a thaona liata “Cha pheipazah pathaihpa cha, ………. Cha hlata Marara tlâh liata, A tlyhpa ama hmô bei ma? ………. Adyuhna cha bâh aw vana, He Marapa râh liana he, Zerusalem padua hla lei, Zaozi paih lia khô mâh vana. (Kz.487).” tahpa eima hmô. Marapa râh tlâh liata Zerusalem padua awpa he Lorrain vision a cha.
i. Sawkha avaona kao la tawhta:
Misawnarizy ama vaw tlô hlâ ta Mara râh cha Lorrain reipa hawh tlai ta “pahno-patheibeileipa râhpathohpa” a cha. Ahy sawkhâ hmâhta tlô mah vei ei. Achhâna ta “Thlawhrâh” tlâh aphytuhpa hmâta a chahrih hawpa râh a cha. Kha hlâ ta cha India nata Burma he British sawkha biehneina ry liata avao pahmaohpa a cha. 1935 liata India Act nata Burma Act Dah taopa chata, 1937 ta hma pathaopa a cha rakha tawhta India nata Burma he râh-ri hrie khâhpata a eih ta a vao hawpa a cha. Râh-ri hriena daihti liata a ti nata tlâh chyhsa a chyhta dâhdei chhao a sao hiahpa cha vei. Moku pahâh kawpata ama môna daihti chata, khichhaipata ti nata tlâh chô liata ku ama vaw pathlapa a pasasa nawpa châh chhao pahno mah vei ei. He râh-rina ta hmah a paphao tua chaipa cha Lushaipa cha leipata Chinpa cha hra vei. Marapa chipho a cha. Râh-rina ta Lakher Pioneer Mission râh a patlaw chheih hawpa vata Lorrain palôh a pasasa.
LPM raihriana râh cha Lushai misawnari nata Chin misawnari zy raihriana râh likawh liata Marapa pahrâna râh a cha. American Baptist Chin Mission, Hiakha ta Lorrain tuapa biechhotuhpazy Burma râh lata ama tly tyhpa ama ly thei tyh leipa vata Hiakha D.C liata bie tlô khei tyhpa a cha. Chavata Chin Hill District D.C Mr. Naylor ta mission py 2 tawhta misawnarizy Pakao(Lôchei Tylai nata Phaphe likawh) liata a tyh awpata a aw. May 24, 1938 liata atyhna hneipa a cha. Chin mission tawhta Dr. Strait nata Dr. Cope (ano he misawnai nata sikul lata sawkha molaipa rai 2 a chakaopa) ama cha. Lakher Mission tawhta Rev.R.A Lorrain, Rev. A.B. Lorrain, Rev.Heisa nata Rev. Leito zy ama cha. Chheipâh liata Mara beipazy ama tlô hra. D.C ta chairman châ ta Lorrain ta palôhpasa kawpata bie varopi a reih. Râh-rina ta Marapa cha pachhaih nga hra sala, Marapa chyhsazy khatinorai ta â pachhai thai leizi nata Marapa chyhsapa châta a thapasa kawna biepha kawpa a reih. Chahrasala, Dr. Cope ta hiatliana nata biehneina ta bie pathlu ta Laotu, Hawthai, Vyutu, nata Ngephepi machha lazy cha Lorrain pasai leina chôta American Baptist Chin Mission ta â la haw. Lorrain cha palôh keichheihna chôta zâ a rie chhao khao leipata Saikao lâ a vaw palie haw.
British sawkha India a puasai chatlie bâ awpa vata, a viasa pha kawpa British molaipa ta Lorrain hnôhta bieparu a chhopa cha “Marapa chyhsazy nainoh sô leipa ta hmo ama tao awpa a byuh” tahpa he a cha. Chavata Marapa chyhsazy ta Lushai chyhsa ryureina ry liata ama y awpa a phaleizi nata Marapa abohna châta ryureina nanopa abyuhzi zydua Tlôsai beipa Chhôhmô hnôh a chho. Chatawh cha Marapa abei zydua vyuhpata Lorrain pasopakana tawhta Puhpa Chhôhmô ta “Marara ryureina eihpa” (Seperate District of Lakher Hill) hiana (Memorundum) Jan.4, 1945, November 3,1945, nata December 1945 ei thôh hia chanei lymapa a cha. He hiana taopa he kaw pitloh lyma ta, 1953 liata Mara Autonomous Reginal Council cha 1972 liata Mara Autonomous District Council lata a cha haw. Atahma Union Territory State tei pathao ngaba heihpa a cha. Lorrain palôhru liata Abeipa bietaihpa râh (promised land) Kanâ hawhta Zerusalem padua awpa a chhuah nga nota Marahpa râh cha saphao laophao hawhta sawkha ryureina nano nanopa liata ama rai khai haw. Chahrasala nohkhakha ta cha râh-ri hrie padâh khao leipa Marara eima vaw hnei thlyu aw.
ii. Thlahpa kao la tawhta:
Ahy sawkha thatlôpa tlyma, Thlaohrâh tlyma, eima Mara râh liata hmasiena tao awpa palôh vaw phao pha vei hra sala Abeipa palôhru liata Marapa cha khâ â lapa vata eima râh liata Zerusalem padua awpata Misawnari ta miah a vaw tlyh tua chai. Lorrain ta hla phi ta “…Cha pheipazah pathaihpa cha……. Cha hla ta Mara râh lia, A tlyhpa ama hmô beih ma…..” September 26,1907 he Mara râh liata thatihpha tlô noh tahpa cha ta, Zisu Krista ta Marapa râh a za tly tuana noh tahna a cha. Thatipha tlô hla ta Marara cha ahripa beihneina râh a cha. Tlâh a ngia viapazy, thokô pha viapazy, by kawh viapazy, tilih a thu viapazy, alôpanô lai viapazy, keimo lopa bia kô taihta ahripa biehneina a chapa vata mothli miah a patlasapa sai a cha. Eima hneipa sahro nata eima thazâh zydua ahri Sata atheihna nata panaohna châta hmâ awpa a cha. Zawsua nata Izarel sahlaozy ta Kanâ râh tlôpâ adyuhna raihriapâ ei ama tahpa hawhta cha ahri raihria cha Misawnarizy ta adyuhna raihria ama vaw pathao lyma. Thohna o ama padua. He he ahripa adyuna chhaichhi sakha a cha. Sahrohzy a pahryuh ta atheihnazy hlâ awpa hlata cha thohna ta tlâhna hmô awpa â thôhzie a pahmôsa ei. Thlachhana ta a tlâhleipa mohôh lyma ei ta, tlâhna ama hmô lyma. Cha kyh vata Lorrain cha thokha pachâna ta “dyu-a-thaipa” ama tahpa ngapa a cha. Pakao liata atyhna a chhâ tawhta a paliena liata Dr. Cope cha tlâhleina a hmô pathlei ta Hiakha atlô tawhta athi hawpa chhao thokha Lorrain kephao vata a cha ama tah tyh. Biedopa a chaleizi cha, ano he dyu-a-thaipa cha tiarah leipata dyu-a-thaipazy nata ahri raihria adyuh awpata K’zohpata Marara lata a vaw tuapa a cha. Ahripa Sata chhao ta a biehneina a vaw parao laihtuhpa Lorrain cha a hao chai hra. Chavata nokha cha Mission bungalore liata Thatipha Zawhana chabu a palie nga nota Hâbâ Lôkah tawhta Lyurahripa vaw pua ta Lorrain vaw tla hnao ta, ahrina nata tha ta a pia eita ahripa ama pahnie haw. Chavata Lorrain hla phi ta “Lyurahri nata keima eima hryu nga la, Ano a na hao, kei chhao ei hao hra, …… Hla. 293″ Chatanachata Lorrain nata a sahlaozy nata Kraws Pheisaizy cha Mara râh tlâh liata ahripa adyuna rai hria lyma eita, cha Kraws Pheisaih zy hry liata Rev. T.Mathao he “Sata kudôh a pachopa” tahpa mohphaona taihta K’zohpata a hmâpa pakha a cha hra. Ahri Sata biehnei tyhna Marara cha “Imannuel” râh tahpata phuah hawpa a cha. Thatipha Zubili a tlôhna Sabyhpi(Vasai) khih liata “Zisu krista cha Abeipa a cha Phi.2:11″ tahpa bieluhpa hmâpata Marara liata ahripa pahniena bie phuahpa a cha. He bie he atanoh taih MEC nata ECM ta Awnanopa Motto châta ama chhy lyma. Hyutuhpa Tledô (Lialaita) ta reih ta “Marara cha Krista thatipha ta pathaisapa râh a cha hawpa vata ahripa a chhaina su hnei khao vei.” a tah. Ahripa Sâtâ biehneina ry liata pathluapata eima y tyhpa kha atahma la, Krista zawzi ta “pathluapa cha khao leipa pita, eima râh chhao pakiana râh Isai 62:4″ eima cha haw. Eima ti nata tlâh zy liata thlalôh kawpata châhkizo thei awpata thatihpha byhna eima to.
Zawsua athi chy ta “Izi râh liata nama chakao tyhpa khazohpa(Krizy hlata Ahripa) ma(?), nama pahrâna râh liata Amawri mo khazohpa(Buddhist, Hindhus) ma(?), acha vei khiah Izi râh tawhta Kanâ a cha vaw tlô kheipa Zehovâ K’zohpa (Zisu Krista) ma(?) nama chakao aw a pasia mu vy, kei nata ei chhôhka ta la Abeipa eima chakao aw”(Zawsua 24:14-15) a tahpa maniah a patheisa kaw.
D. Lorrain Vision liata Mara Chipho
Lorrain ta a utapa J. H. Lorrain he Lushai hry liata a chakao haipa tawhta Lushai nawh pahnona dâh ta Marapa cha “Lakher” tahpata a vaw pahno tua chai. Chahrasala Lakher tahpa he Marapa chipho moh cha leipata “raihria moh” a cha. Chipho moh cha “Mara” a cha. Lorrain chakaona tawhta Marapa moh he unawh pahrawhleipalih ta paduapa chipho hawhta â lâ. Cha zy cha: Tlôsai-Siaha, Lôchei-Hawthai-Vyhtu, Lialai-Heima-Zyhno, Sabyh-Chapi-Ngephe, nata Zôphei-Laotu-Azao zy ama cha.
Historian zy ta chipho laiseihna (civilization) â thaona cha reih châ ta ropa reih sia kawpa ama hneina daihti tawhta ama rei pati. Burma râh liata Byu chipho cha maluh hluh kaw eita, chahrasala, châ(reih) ama hneileipa vata Byu tahpa pahnopa cha khao vei. Mara chipho a-ipa a cha thei nawpata pazu-pavaw reih hawhta a y chakhyhpa Mara reih cha Rawma hawrawh ahlypa ta 1908 liata A>AW>B>CH châ ta rei thaipa nata ro thaipa lata a tao.. A ao siezi cha Tlôsai ao châ ta, Tlôsai reih he Marapa chhôh liata unawh zydua reih zy nata a kâpia thei chaipa reih a chapa vata Mara unawh 14 ta ama hly thei chai awpa hawhta a pahnopa vata â tlypa a cha tahpa thokha ama rei. Marapa ta ahlypa reih eima hnei theipa he Thatipha byhna sôhpa a cha. Atahma hla Chin tlâh liata athaipa Za Tuah Ngur, Cung Lian Hup, Lian Hmung nata a hropazy Chin tlâh zydua liata reih ahlypa (Common Language) ama tao leina kyh vata Dr.Cope nata American Baptist Chin Mission chô liata ama ly thei kaw leina ama rei.
Mara reih ta châ achuna sikul padua ta Saiha khihpa Mawkha nata Laihnao zy he achu tua chaipa ama cha. Kô 1911 tawhta Mission sikul a pha viapata padua ta Biehrai paliena rai thata hria eita, 1912 liata thatipha Zawhana patlô ta, 1923 liata Mara reih ta achuna bu Lakher-English Dictionary, Lakher Grammar, Krizyhpa Hlabu, 1927 liata Biehrai Thiepa bu chhuhpa cha ta, 1956 liata Holy Bible hneipa a cha. He he Rev. A.B. Foxall (Vailipaw) daihti liata a cha. Chavata Mara Holy Bible he Mizo Holy Bible(1959) hla ta kô 3 ta uthei via tahna a cha. Lakher Pioneer Mission ta Marapa chipho paduana/papina(midwife) nata palaiseihsana rai tha ta a vaw hria. Marapa cha Thatipha ta sapapuapa chipho a cha(Hla. 33:12). Marapa unawh (14) zy aw pakhy ta pohkha ta a chahry pabaohtuhpa cha Misawnarizy chi tupa Thatipha bie, Biehrai, nata Mara châ zy dei ta he a cha. Chavata R.A Lorrain he Marapa chipho misawnari ta a py tlâhpa a cha (IKaw.4:15). Thatipha chhao Marapa chipho a duana chaipa nata a laiseihna chaipa a cha. Chavata Thatihpha eima vaw chakao phahla hawna daihti liata cha chipho chhao pahlei pata eima y pathlei aw(Isai60:12).
E. Lorrain Vision liata Marapa Krizyna
K’zohpata Marapa Kri pazysa awpa he Lorrain a aw chhâna chaipa a cha aw. Zisu ta a tuapa pachutuhpazy hnôh ta “ahripazy nama bie ta ama ypa vana heta aly kha-u, avâ liata nama mohzy ropa a chapa vata tlao aly teh u” a tahpa hawhta Marara liata Zerusalem padua awpa va deita ta Lorrain a lyna cha leipa awta. Marasaw zydua varâh liata moh ropa ama cha khai hla leita cha Lorrai a lyna aki thei aw vei. Chavata Kri pazysana raihria he atôhpi ta ma vaw chakao. Ama thatipha chho chaipa chhao “vârâh khoh a chhihzi nata meitipo hiehahna chi a chhihzi” rei eita, chavata ahyrai varâh liata moh ro awpa a khohpa maih Zisu a vaw ngiapâ ta Krizyna liata mo a ro awpa” he a cha.
Saikao khih ama vaw tlô tawhta Mara reih a vaw chu ei, areipi a y awpa ama pangiasa leipa vata Mara reih cha a do-âh leipa lata “Awh-ta-chhih, Vao-ta-chhih, Sei-ta-chhih” tahpazy ta ama vaw pachu. Kôkha atloh hlata Saikao beipa Thylai tlyhmia liata Mara reih ta thatipha phuah tua chaipa cha “thyu la, khaih teh, Marapa sawzy, nama khaihna cha a vaw tlô haw hi” he a cha. Kô 3 hriapasa khai tawhta ngiapâtuh hmia tua cha Thytu (September 16,1910) a cha. Lorrain chi tupa Thatipha cha “thinô hmotaotheina(Mt. 13:33)” hawhta laiseih lyma ta 1927 liata ngiapâtuhpa 1850, 1936 liata 5000 kô 50 Zubili liata ngiapâtuhpa 10400, nata atanoh Setenari eima tlôna liata Marapa 100 liata 100 Krizy khaipa a vaw cha haw.
Local Church padua tua chaipa cha Saikao Local (1916) chata, sanona cha Siaha Church(atahma Siaha Vaihpi) a cha. Nochhi Marara lâta Sabyh (1945) liata Local Church a dua tua chai. Rev. Heisâ he ordained tua chaipa chata, Rev. K.Teitu he Bible College (Cherrapuji, Shillong, 1953-57) achu tuachaipa a cha. Awnanopa moh chhao chipho moh pahlaopa pata “Lakher Church” tahpata aw tua chaipa cha. Cha Awnanopa kô cha a chiahzy vaw pachiah ta June 10,1947 liata Krizyhpa Thyutlia Py a duah ta, May 17,1951 liata Krizypa Nô Py â vaw duah. 1960 liata A.B.Foxall ta “Lakher Independent Evangelical Church” tahpa moh a bi. Kô 1967 ta Awnanopa moh liata “Lakher” tahpa cha “Mara” tahpata ama panano. Nochhi Marara 1987 liata “Mara Evangelical Church” tahpa chata, notla Marara liata 1989 liata Evangelical Church of Maraland tahpa a cha. Atanoh Marara liata Awnanopa Denomination a chyh chaita py 16 (MEC/2000) a y aw. Anodeikua Lorrain palôhphao liata Marara liata Denomination padua awpa hlata ama zydua Krizyhpa ama cha khai awpa he a cha via thlyu aw. Khei hawhpa Denomination liata eima ypa chhao Mara Biehrai nata Hlabu eima hly thei khiah la Lorrain palôhphao cha hlâh veima ei tah.
Varâh liata moh ropa tahpa he chyhsa hro hluhpi a sapapua. “Ahripa biehneina seichâna tawhta K’zohpa saw chhôhkha lata, zona tawhta khaihna lata, hnabeidyna tawhta hnabeiseih lata, china tawhta thlalôhna lata, etc… tahpazy ta a cha. He Misawnarizy phuahpa Zisu Krista Thatipha bie vata Abeipa ta hmo rôhnah ngaitapazy miah taopa ta eima ly ngaita kaw(Hla.126:3). Abeipa ta ei chô liata hmo phapa to a taopa vana he Abeipa cha khapa ei pie hri aw(Hla.116:12). Krizyna ta eima hmahsiena, thlalôhna, hnabeiseihna, tlâhna, hmotaotheina, eimâ bohna chaipazy ta maniah â vaw dua khei.
Chahrasala, Thatipha eima vaw chakâh pathleina daihti liata cha Thatipha tlai cha eima pachiana, chhisana, raona, paipatlahna lata a vaw cha heih hra aw. Chavata Marapa chipho atlâh parei thei nawpata “molei ro ta Abeipa hmiakô liata reihpha chei tyh awpa he ( IIRyhp.7:14) eima bie vaopa cha mawh sy.
F.Bie pachhana
Lorrain cha awna ao cha eina hnei leipata a pina khihpi London nata a lôkhei viasazy cha hnôhchhy ta Marapa nata chipho châta misawnari a hlâna hmeiseihpa cha a râpasua ta achhâna taihta a patlô haw. Lorrain chhôhkhazy cha ama chakaona su Marara liata luh a pabupa ta Tlosaipaw ta January 2, 1944, Tlôsainô ta May 23, 1960, Vailinô (Tlosai) ta June 21, 1968 nata Vailipaw ta June 2, 1977 liata ama chakaopa tyhpa Abeipa lâta ama di haw. Misawnari hnôhchaipa Pinô Vaili atahma taih eima hnôh ta a y. Amozy la lytlâh miakho sai khai haw eita, Setenari chhâtliasawzy pita Lorrain Vision cha a “ryuhi” hawhta eima pasô kaw awpa a pha ei tah.
Chipho moh “Mara” tahpa tlai he Thatipha nata Châ ta unawhzy Tlôsai-Siaha, Lôchei-Hawthai-Vyhtu, Lialai-Heima-Zyhno, Sabyh-Chapi-Ngephe, nata Zôphei-Laotu-Azao ta paduapa moh ahlypa zawpi eih a cha. Eima châ chhao vaw laiseih lyma aw ta nohkhakha ta cha tlokhuh ahlypa reih lata a vaw cha aw. Chavata unawh riethei viapa tlyma, hmasie lei viapa tlyma pathluana zy, eima ti nata tlâh achâhkheipata unawhzy achhohia thaileinazy eima hry liata a laiseih khiah la, nata eima chipho paipatlahna lata a vaw cha pathlei aw. Misawnarizy palôhphao hawhta “adyhryh kawpata unawhzy “Mara” moh liata pahrâ khohpa Hla. 133″ he eima byhnâ tona a cha aw.
Marapa chipho papina, paduana nata palaiseihsana he Thatipha tawhta eima hmôpa chata K’zohpa kyhpachâna a cha (Ryh.7:7). Marapa chipho cha Thatipha ta sapapuapa a chapa vata Thatipha eima duakheina cha Marapa chipho a bohna vaw cha aw ta, chipho eima zakheina chhao maniah a sapapuatuhpa Thatipha nata Misawnarizy eima zakheina a cha hra aw.Thatipha liata eima duana a-i chhôh zydua Marapa chipho a tlâhparei hra aw.
Thatipha chi pabupa cha Krizyna vaw papi ta, cha Krizyna liata Awnanopa nata Chipho achâhkheina phupy vaw pih heih ta, Awnanopa Denomition hluhpi nata District Council, Mara Thyutlia Py, Mara Chanô Py, nata MSO(MSA) zy Marasawzy a pahnieh nawpa su (Mt. 13:30) lata a laiseih lyma haw. Chavata phupy zydua thabypa cha Thatihpha a chapa vata he phupy zy ahneituhpa nata a zibeipa cha Zisu Krista a cha aw. Vision sakha tawhta apuapa khohpa eima chana kyh vata Awnanopa nata phupy hropazy ta ama chhohia thai kaw awpa a pha.
Marara chhao Thatipha biehmeiseihpa ta pathaisa hawpa Immanuel râh chata, he râh liana he ta Zisu Krista deita a bei chai vei mawh sala, Misawnarizy hro liata K’zohpa palôhphao cha leipa aw ta, eima râh cha thlalôh a chhih khao hra aw vei. Chhôkha nata Awnanopazy, sawhkhana nata ryureina zydua liata Zisu Krista beihneina a to va tlyma(?). Marara liata Zisu Krista bie a vaw thei hnei khao leina daihti liata mo hropa (khichhaipa)zy bie vaw hnei aw eita, Marara chata Misawnarizy ama vaw hrâkâ tyhpa palôhphao cha khao aw vei.
Chavata Setenari daiti liata he eima K’zohpata Mara sawzy châta maniah a khokheina Lorrain liata a palâsa hawpa kha athei thlâhna chô ta eima Zisu Krista nata Thatipha, Marapa nata chipho cha chakao lyma su vy.
(He Sermon he MCF: Bangalore Apakhyna Dt. September 17, 2007 Sermon tawhta lapa a cha)
